ប្រភព៖ Kiripost
ពលករខ្មែរជិត ១០ម៉ឺននាក់នៅតែស្ថិតក្នុងភាពមិនច្បាស់លាស់នៅឡើយ ដោយការបន្តលិខិតអនុញ្ញាតការងារត្រូវបានផ្អាក ខណៈរដ្ឋាភិបាលថៃវាយតម្លៃថា ពួកគេមានហានិភ័យផ្នែកសន្តិសុខ ដែលមានន័យថា ពលករទាំងនោះមិនអាចធ្វើការដោយស្របច្បាប់ ឬត្រឡប់មកស្រុកកំណើតវិញបានឡើយដោយសារការបិទព្រំដែន។ យ៉ាងណា កម្ពុជាបញ្ជាក់ថា មានការងាររង់ចាំពួកគេ ពេលត្រឡប់មកស្រុកកំណើតវិញ
អនាគតនៃពលករខ្មែរប្រហែល ១០ម៉ឺននាក់ ដែលជាប់គាំងនៅក្នុងប្រទេសថៃនៅតែស្ថិតក្នុងស្ថានភាពមិនប្រាកដប្រជា បន្ទាប់ពីអាជ្ញាធរថៃបានផ្អាកការបន្តលិខិតការងាររបស់ពួកគេដើម្បីវាយតម្លៃ «ហានិភ័យសន្តិសុខ» ទាក់ទងនឹងការផ្តល់ការងារដល់ពួកគេឡើងវិញ។ ជាការឆ្លើយតប មន្ត្រីកម្ពុជាបានផ្តល់សញ្ញាថា រដ្ឋាភិបាលបានត្រៀមខ្លួនរួចជាស្រេចដើម្បីស្វាគមន៍ពលករទាំងនោះមកផ្ទះវិញ។
កាលពីថ្ងៃទី១៧ ខែកុម្ភៈ រដ្ឋមន្ត្រីក្រសួងការងារថៃ លោកស្រី Treenuch Thienthong បានប្រាប់សារព័ត៌មានថា គណៈរដ្ឋមន្ត្រីនឹងពិចារណាលើការបន្តលិខិតអនុញ្ញាតការងារសម្រាប់ពលករកម្ពុជាប្រមាណ ១០ម៉ឺននាក់ បន្ទាប់ពីភ្នាក់ងារសន្តិសុខបានវាយតម្លៃហានិភ័យសន្តិសុខដែលទាក់ទងនឹងការបន្តផ្តល់ការងារដល់ពួកគេ។
លោកស្រីបានប្រាប់អ្នកសារព័ត៌មានថា មុននឹងសម្រេចថាតើត្រូវបន្តលិខិតការងារ ឬយ៉ាងណា រដ្ឋាភិបាលថៃត្រូវវាយតម្លៃលើស្ថានភាពព្រំដែន និងហានិភ័យសន្តិសុខពាក់ព័ន្ធជាមុនសិន។ រដ្ឋមន្ត្រីរូបនេះបានបញ្ជាក់ថា នីតិវិធីនេះកំពុងតែត្រូវបានពិនិត្យមើល។
លោកស្រី Treenuch បានទទួលស្គាល់ថា អាជីវកម្មថៃបានរងផលប៉ះពាល់ដោយសារបញ្ហាព្រំដែន ជាពិសេសក្នុងវិស័យកសិកម្ម។ ទោះជាយ៉ាងណាក៏ដោយ លោកស្រីបាននិយាយថា វាសំខាន់ក្នុងការថ្លឹងថ្លែងពីកង្វល់ទាំងនេះ ជាមួយនឹងសន្តិសុខជាតិ។
លោកស្រីបន្ថែមថា បច្ចុប្បន្ន ពលករខ្មែរកំពុងជាប់គាំងក្នុងប្រទេសថៃ ដោយសារព្រំដែនត្រូវបានបិទ មានន័យថា អ្នកដែលផុតកំណត់លិខិតអនុញ្ញាតការងារទាំងអស់នោះ កំពុងរស់នៅ និងធ្វើការក្នុងប្រទេសដោយខុសច្បាប់។ លោកស្រីបាននិយាយថា ពលករជិត ១០ម៉ឺននាក់រងផលប៉ះពាល់ ហើយមិនអាចត្រឡប់ទៅផ្ទះវិញបានឡើយ។
ជាការឆ្លើយតប លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានប្រាប់គិរីផូសថា៖«សម្រាប់ក្រសួងយើង ការសម្រេចចិត្តបែបនេះ គឺជាបញ្ហាផ្ទៃក្នុងរបស់ភាគីថៃ ប៉ុន្តែខ្ញុំចង់បញ្ជាក់ឱ្យច្បាស់ថា កម្ពុជាបានរៀបចំយន្តការចាំបាច់ទាំងអស់ ដើម្បីជួយដល់ពលកររបស់យើង ក្នុងករណីពួកគេត្រូវបានបញ្ជូនមកវិញ ដើម្បីឱ្យមានការងារធ្វើ»។
លោកបញ្ជាក់ថា បច្ចុប្បន្នកម្ពុជាមានតម្រូវការពលកររាប់ម៉ឺននាក់។ លើសពីនេះ គម្រោងវិនិយោគដែលត្រូវបានអនុម័តក្នុងឆ្នាំ២០២៥ ត្រូវបានព្យាករថានឹងបង្កើតការងារបានចំនួន ៤៣០០០០កន្លែង ខណៈការងារ ៩០០០០កន្លែងត្រូវបានបង្កើតរួចរាល់ហើយ។
លោក ស៊ុន មេសា បាននិយាយថា៖«ទោះបីជាកម្ពុជា និងថៃមានជម្លោះព្រំដែនក៏ដោយ ប៉ុន្តែការងាររបស់យើងនៅតែមានប្រចាំការនៅក្នុងប្រទេសថៃ ហើយយើងនឹងបន្តធ្វើការជាមួយដៃគូរបស់យើង ដើម្បីធានាអត្ថប្រយោជន៍សម្រាប់ពលកររបស់យើងដែលនៅទីនោះ»។
«ក្រសួងការងារសូមជម្រាបជូនដំណឹងដល់កម្មករនិយោជិតទាំងអស់ថា ក្នុងករណីមានការរើសអើង ឬការរំលោភបំពាននៅទីនោះ ហើយប្រសិនបើអ្នកចង់ត្រឡប់មកធ្វើការនៅប្រទេសកម្ពុជាវិញ យើងសូមស្វាគមន៍ ព្រោះយើងមានការងារជាច្រើនដែលមានសុវត្ថិភាពជាង និងមានប្រាក់ចំណូលប្រហាក់ប្រហែលគ្នា»។
យោងតាមលោក ឃុន ថារ៉ូ ប្រធានកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ បានឱ្យដឹងថា ពលករកម្ពុជាប្រមាណ ៥០ម៉ឺននាក់ ទាំងមានឯកសារ និងគ្មានឯកសារ នៅតែស្ថិតក្នុងប្រទេសថៃ ខណៈពលករប្រមាណ ១លាននាក់បានត្រឡប់មកកម្ពុជាវិញចាប់តាំងពីមានជម្លោះព្រំដែន។
លោកបានណែនាំដល់ពលករចំណាកស្រុកកម្ពុជាដែលរងផលប៉ះពាល់ទាំងអស់ឱ្យបន្តធ្វើការដូចធម្មតា ខណៈរង់ចាំការអនុម័តចុងក្រោយពីរដ្ឋាភិបាលថៃ។ ក្នុងអំឡុងពេលរង់ចាំនេះ ពួកគេគួរតែបន្តតាមដានដំណឹង និងត្រៀមខ្លួនក្នុងករណីដែលចាំបាច់ត្រូវមានការវិលត្រឡប់មកប្រទេសកម្ពុជាទ្រង់ទ្រាយធំ។
លោក ឃុន ថារ៉ូ បាននិយាយថា៖«ទោះជាយ៉ាងនេះក្តី ខ្ញុំនៅតែមានសុទិដ្ឋិនិយមថា ប្រទេសថៃទំនងជាបន្តផ្តល់ការងារដល់កម្មករទាំងនេះ ដោយសារក្តីបារម្ភដែលនិយោជកក្នុងវិស័យឯកជនកំពុងព្រួយបារម្ភអំពីការរក្សាកំណើនសេដ្ឋកិច្ច និងការដោះស្រាយបញ្ហាកង្វះកម្លាំងពលកម្មដែលកំពុងកើតមាន»។
លោកបានបន្ថែមថា ការវិលត្រឡប់មកវិញទ្រង់ទ្រាយធំរបស់ពលករកម្ពុជាពីប្រទេសថៃក្នុងអំឡុងភាពតានតឹងព្រំដែនឆ្នាំ២០២៥ តំណាងឱ្យ «ចលនាចាកចេញភ្លាមៗ» បំផុតមួយចាប់តាំងពីវិបត្តិកូវីដ១៩។
លោកបានរៀបរាប់ថា ការសិក្សាមួយរបស់សង់ត្រាល់បញ្ជាក់ថា ការវិលត្រឡប់មកវិញមិនមែនជា «ដំណើរការសមាហរណកម្មដែលមានការគ្រប់គ្រងគ្រប់ជ្រុងជ្រោយទេ ប៉ុន្តែជាការរំខានដោយសារវិបត្តិ» ដោយគ្រួសារជាច្រើនបានចាកចេញដោយគ្មានប្រាក់ចំណូល សន្តិសុខស្បៀង ឬលទ្ធភាពទទួលបានជំនួយ។
លោកមានប្រសាសន៍ថា៖«សម្រាប់អ្នកត្រឡប់មកវិញភាគច្រើន ការបាត់បង់ការងារស្របគ្នាជាមួយនឹងបំណុលដែលស្ថិតក្នុងកម្រិតខ្ពស់ស្រាប់ បង្កើតភាពតានតឹងផ្នែកហិរញ្ញវត្ថុភ្លាមៗ និងដាក់កម្រិតនូវជម្រើសក្នុងការស្តារឡើងវិញយ៉ាងខ្លាំង»។
គួរឱ្យដឹងថា កាលពីថ្ងៃទី១៨ ខែកុម្ភៈ ឯកអគ្គរដ្ឋទូតជប៉ុនលោក Ueno Atsushi និងលោកស្រី Xiaoyan Qian នាយិកាប្រចាំប្រទេសនៃ ILO កម្ពុជា បានចុះហត្ថលេខាលើលិខិតប្តូរសារសម្រាប់ «គម្រោងលើកកម្ពស់ការងារសម្រាប់ពលករចំណាកស្រុកត្រឡប់មកវិញដែលរងផលប៉ះពាល់ពីជម្លោះព្រំដែន» ជាមួយនឹងជំនួយឥតសំណងសរុបចំនួន ១៥៦លានយ៉េនជប៉ុន (ប្រហែល ១លានដុល្លារ)។
គម្រោងនេះមានគោលបំណងផ្តល់ការបណ្តុះបណ្តាលវិជ្ជាជីវៈ និងឱកាសផ្គូផ្គងការងារដល់ពលករចំណាកស្រុកដែលត្រឡប់មកពីប្រទេសថៃ។
ស្ថានទូតជប៉ុនប្រចាំទីក្រុងភ្នំពេញបានបញ្ជាក់ថា៖«យើងរំពឹងថា គម្រោងនេះនឹងជួយស្តារឡើងវិញនូវជីវភាពរស់នៅប្រកបដោយស្ថិរភាពសម្រាប់ពលករចំណាកស្រុក ក៏ដូចជាគ្រួសាររបស់ពួកគេឲ្យមានភាពប្រសើរឡើងវិញ»៕