ប្រភព៖ VOD
មន្ត្រីសិទ្ធិការងារទទួលបន្ទុកផ្នែកពលករចំណាកស្រុករបស់អង្គការសង់ត្រាល់ (Central) ប្រចាំប្រទេសថៃ លោក លឹង សុផុន អំពាវនាវយ៉ាងទទូចដល់ពលករខ្មែរកុំជ្រួលច្របល់តាមគ្នា និងរត់ត្រឡប់ទៅប្រទេសកម្ពុជានៅពេលនេះ ទាំងដែលស្ថានការណ៍ព្រំដែននៃប្រទេសកម្ពុជា-ថៃ មិនទាន់បានល្អប្រសើរ។
លោកក្រើនរលឹកដល់ពលករខ្មែរទាំងអស់ ត្រូវរក្សាភាពស្ងៀមស្ងាត់បន្តការងារជាធម្មតាសិន បើទោះបីជា ទិដ្ឋាការការងាររបស់ពលករខ្មែរជាង ១៤ម៉ឺននាក់ នឹងផុតកំណត់នៅថ្ងៃទី១៣ ខែកុម្ភៈ និងចុងខែមីនា ឆ្នាំ ២០២៦នេះក្ដី។ លោកបន្តថា ស្ថានភាពពលករខ្មែរពិបាកជាងពលករប្រទេសដទៃ ដែលកំពុងធ្វើការនៅប្រទេសថៃ។
លោក លឹង សុផុន និយាយថា៖ «ក្នុងឆ្នាំ២០២៥កន្លងមក រដ្ឋាភិបាលថៃមិនប្រកាសឱ្យតទេ សម្រាប់ពលរដ្ឋខ្មែរ។ សម្រាប់ពលរដ្ឋបរទេស ដូចជា ពលករវៀតណាម ពលករឡាវ ពលករភូមា គេអាចតបាន»។
ពលករខ្មែរមួយចំនួនបានត្រឡប់មកកម្ពុជាវិញ កាលពីថ្ងៃទី៩ ខែកុម្ភៈ ក្រោយការប្រកាសលទ្ធផលបោះឆ្នោតជាតិរបស់ប្រទេសថៃ កាលពីចុងសប្ដាហ៍ ដែលគណបក្សភូមិចៃថៃ របស់លោក អានុទីន ចាន់វីរៈគុល (Anutin Charnvirakul) បានសំឡេងឆ្នោតលើសគេ និងអាចដឹកនាំរដ្ឋាភិបាលថ្មី។ តាមរយៈវីដេអូដែលចែកចាយលើបណ្ដាញសង្គម ពលករខ្មែរទាំងនោះ បានត្អូញត្អែរ ព្រោះទិដ្ឋាការការងាររបស់ខ្លួន ពុំត្រូវបានក្រសួងការងារថៃបន្តសុពលភាពទេ។
មន្ត្រីអង្គការសង់ត្រាល់ (Central) ប្រចាំប្រទេសថៃដដែល អះអាងថា ខណៈព្រំដែនបន្តបិទ ពលករខ្មែរភាគច្រើនត្រូវប្រថុយប្រថានរត់ទៅកម្ពុជាវិញ តាមច្រករបៀងតូចៗ តាមរយៈមេខ្យល់ ដែលជាហេតុត្រូវបានចាប់ខ្លួនពីសំណាក់តម្រួតថៃ និងទាហានជើងទឹកជាដើម។ ចំណែកអ្នកមានលទ្ធភាព ពួកគេធ្វើដំណើរតាមយន្តហោះជាដើម។
លោក លឹង សុផុន អះអាងថា ទោះក្រសួងការងារថៃមិនទាន់ចេញលិខិតផ្លូវការ បន្តទិដ្ឋាការការងារដល់ពលករខ្មែរក្ដី ប៉ុន្តែគេពុំមានគោលការណ៍បណ្ដេញនោះទេ។ ផ្ទុយទៅវិញ ក្រសួងការងារថៃ ហាក់ចង់ឱ្យពលករខ្មែរអាចបន្តធ្វើការរហូតដល់ចុងឆ្នាំ២០២៦។ ចំណុចនេះ ដែលលោកស្នើដល់ពលករខ្មែរ កុំទាន់អាលជ្រួលច្របល់ និងកុំជឿថា រដ្ឋាភិបាលថ្មីនឹងបណ្ដេញពលករខ្មែរ។
លោក លឹង សុផុន និយាយថា៖ «ខ្ញុំមិនចង់ឱ្យពលរដ្ឋខ្មែរធ្វើដំណើរ អំឡុងពេលមានបញ្ហាអ៊ីចឹងទេ។ យើងគួរចាំតាមដានមើលស្ថានការណ៍ ថាតើក្រសួងការងារគេមានសេចក្ដីប្រកាសយ៉ាងម៉េច ដោយបន្តតាមដានបន្តទៀត ព្រោះថ្មីៗនេះ រដ្ឋាភិបាលថ្មីរបស់ថៃមិនទាន់បានរៀបចំអ្វីនៅឡើយទេ»។
វីអូឌី មិនអាចទាក់ទងអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ស៊ុន មេសា សុំការបញ្ជាក់ពីវិធានការដោះស្រាយបញ្ហានេះបានទេ នៅថ្ងៃទី១០ ខែកុម្ភៈ ដោយលោកបានចូលមើលសារ ប៉ុន្តែ មិនបានតបវិញទេ។ ផ្ទុយទៅវិញ លោកចង់ឱ្យអ្នកសារព័ត៌មានវីអូឌីថតកាតកាសែត និងភ្ជាប់រូបថត ទាំងដែលលោកដឹងថា វីអូឌី ពុំមានមានមូលដ្ឋាននៅកម្ពុជា បន្ទាប់ពីរដ្ឋាភិបាលកម្ពុជាធ្វើទុក្ខបុកម្នេញកម្ចាត់សារព័ត៌មានឯករាជ្យពីកម្ពុជាហើយនោះ។
ប៉ុន្តែ លោក ស៊ុន មេសា បង្ហាញសកម្មភាពយ៉ាងច្រើនរបស់ក្រសួង ដែលចុះផ្សព្វផ្សាយវេទិកាការងារនៅតាមបណ្ដាខេត្ត តាមរយៈហ្វេសប៊ុករបស់លោក ដោយអះអាងថា មានការងារជាច្រើនសម្រាប់ពលករខ្មែរពីថៃ។
លើសពីនេះ លោកធ្លាប់អះអាងថា កាលពីដើមខែមករា ឆ្នាំ២០២៦ ពលករខ្មែរត្រឡប់ពីប្រទេសថៃជាង ៦០ម៉ឺននាក់ ហើយទទួលបានការងារធ្វើ។
ប៉ុន្តែ មន្ត្រីអង្គការសង់ត្រាល់បង្ហាញតួលេខផ្ទុយពីនេះ ដោយអះអាងតាមរបាយការណ៍ស្ទង់មតិថា ពលករខ្មែរពីថៃដែលមានការងារធ្វើ តែជាង ៣០ភាគរយប៉ុណ្ណោះ ក្នុងចំណោមពលករជាង ៩៥ម៉ឺននាក់ ដែលត្រឡប់មកកម្ពុជាវិញ អំឡុងពេលថៃវាយប្រហារឈ្លានពានកម្ពុជាយ៉ាងកម្រោល។
អ្នកតាមដានភូមិសាស្ត្រនយោបាយនៅតំបន់អាស៊ីប៉ាស៊ីហ្វិក លោក សេង វណ្ណលី ប្រាប់វីអូឌីនៅថ្ងៃទី១០ កុម្ភៈថា ទិដ្ឋាការការងារនេះ ជាបញ្ហារសើប ដែលលោកស្នើដល់ពលករខ្មែរត្រូវរក្សាភាពស្ងៀមស្ងាត់ជាចម្បង និងតាមដានព័ត៌មានជាប្រចាំពីប្រភពទុកចិត្តបាន និងសហការជាមួយសង្គមស៊ីវិលដែលធ្វើការជួយការពារសិទ្ធិពលករ ដើម្បីបន្តទិដ្ឋាការការងារឡើងវិញ។ លោកថា ការសម្រេចចិត្តដោយស្លន់ស្លោរត់មកកម្ពុជា នឹងធ្វើឱ្យបាត់បង់អត្ថប្រយោជន៍ការងារ និងបញ្ហាផ្សេងៗតាមដងផ្លូវ។
ផ្ទុយទៅវិញ ការរង់ចាំការស្ថានការណ៍នយោបាយ និងសម្របសម្រួលផ្នែករដ្ឋបាល គឺជាជម្រើសសមស្របបំផុត។ ចំណែកក្រសួងការងារមិនត្រូវរក្សាភាពស្ងៀមស្ងាត់ឡើយ ដែលបណ្ដាលឱ្យមានការភាន់ច្រឡំឡើយ ដោយត្រូវធ្វើតួនាទីជាប្រចាំដើម្បីដោះស្រាយជូនពលករខ្មែរ តាមរយៈការពន្លឿនកិច្ចសហប្រតិបត្តិការទូតជាមួយថៃ ដើម្បីសម្របសម្រួលបន្តទិដ្ឋាការទាន់ពេល និងកាត់បន្ថយភាពតានតឹងដែលកើតពីបញ្ហាព្រំដែន។
លោក សេង វណ្ណលី ថ្លែងថា៖ «ការចេញសេចក្ដីថ្លែងការណ៍ឱ្យបានច្បាស់លាស់ និងបង្កើតក្រុមការងារចម្រុះដើម្បីចុះសួរសុខទុក្ខ ក៏ដូចជាផ្ដល់ប្រឹក្សាផ្ទាល់ដល់ពលករតាមបណ្ដាខេត្តជាប់ព្រំដែន និងតំបន់សេដ្ឋកិច្ចសំខាន់ៗក្នុងប្រទេសថៃ នឹងជួយកាត់បន្ថយការព្រួយបារម្ភ និងបង្ហាញពីការទទួលខុសត្រូវរបស់រដ្ឋាភិបាលខ្មែរ ចំពោះជោគវាសនារបស់ពលករខ្មែរនៅក្រៅប្រទេស ពិសេសនៅប្រទេសថៃតែម្ដង»។
កន្លងទៅ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ តែងអះអាងពីតួលេខថា ពលរដ្ឋកម្ពុជាមានការងារធ្វើប្រមាណ ៩៩ភាគរយ ប៉ុន្តែតួលេខនេះពុំឆ្លុះបញ្ចាំងពីការពារពិតទេ ពីព្រោះពលរដ្ឋខ្មែរជាង ២លាននាក់ បានចំណាកស្រុករកការងារនៅប្រទេសថៃ និងបណ្ដាប្រទេសផ្សេងទៀត ដូចជា កូរ៉ ជប៉ុន ចិន និងម៉ាឡេស៊ីជាដើម។
ការណ៍នេះ អ្នកសិក្សាការអភិវឌ្ឍសង្គម តែងស្នើរដ្ឋាភិបាលឱ្យទទួលយករបាយការណ៍ពិត និងឯករាជ្យដើម្បីអាចដោះស្រាយចំបញ្ហា ជាជាងការស្មាន ហើយប្រើក្រុមមនុស្សរបស់ខ្លួនផ្សាយបំភ្លៃថែមទៀត។ លើសពីនេះ គួរជៀសវាងបង្កើតជាវប្បធម៌កាន់ជើងម្ខាងៗ ហើយបញ្ហាអត់ការងារធ្វើ នៅតែជាផលលំបាករបស់ពលរដ្ឋ ដែលនាំឱ្យពួកគេបង្ខំចិត្តចំណាកស្រុកទៅធ្វើការជាពលករនៅស្រុកថៃ៕