ប្រភព៖ tfa
អង្គការបណ្ដាញពលករចំណាកស្រុក(MWG) របស់ប្រទេសថៃ បានរកឃើញថា ពលករខ្មែរជាច្រើននាក់ ត្រូវអាជ្ញាធរថៃប្រមូលទារប្រាក់ ខណៈពួកគេលួចឆ្លងដែនចូលក្នុងប្រទេសថៃដោយខុសច្បាប់។ អង្គការមួយនេះ បានព្រមានអំពីការរីករាលដាលនៃអំពើពុករលួយ កាន់តែធ្ងន់ធ្ងរនៅក្នុងប្រព័ន្ធសំណូកសម្រាប់ពលករបរទេស ដែលប្រព្រឹត្តដោយអាជ្ញាធរថៃ។
នេះគឺជាករណីដ៏កម្រមួយ ដែលអង្គការសង្គមស៊ីវិលរបស់ថៃ បានបកអាក្រាតពីអំពើពុករលួយ ដែលប្រព្រឹត្តដោយអាជ្ញាធរថៃ មកលើពលករបរទេស។
នៅក្នុងសេចក្ដីថ្លែងការណ៍ ដែលបានចុះផ្សាយកាលពីថ្ងៃទី២៨ ខែមករា អង្គការបណ្ដាញពលករចំណាកស្រុក (Migrant Working Group MWG) បានលើកឡើងថា ពលករខ្មែរ ដែលឆ្លងដែនដោយខុសច្បាប់ចូលប្រទេសថៃ ក្នុងម្នាក់ៗ ត្រូវបង់ប្រាក់សំណូក ទៅឱ្យអាជ្ញាធរថៃ ដែលប្រចាំការនៅច្រកព្រំដែន យ៉ាងហោចណាស់ចំនួន ៤ដង ដែលគិតជាទឹកប្រាក់រហូតដល់ជាង ១ពាន់ដុល្លារ។
អង្គការបណ្ដាញពលករចំណាកស្រុក រកឃើញថា ពលករខ្មែរ ដែលបានវិលត្រឡប់មកប្រទេសកម្ពុជាវិញ តាមការអំពាវនាវរបស់ប្រធានព្រឹទ្ធសភាកម្ពុជា លោក ហ៊ុន សែន ក្នុងអំឡុងមានវិវាទរឿងព្រំដែនរវាងកម្ពុជា-ថៃ បានប្រឈមមុខនឹងអនាគតមិនប្រាកដប្រជា ភាពអត់ការងារធ្វើ ភាពអត់ឃ្លាន និងជួបបញ្ហាជីវភាពលំបាក ដែលខុសពីកាលធ្វើការនៅប្រទេសថៃ ដោយពួកគេអាចផ្ញើប្រាក់ទៅចិញ្ចឹមគ្រួសារបានយ៉ាងសមរម្យ។
អង្គការមួយនេះ បង្ហាញថា ដោយសារជួបប្រទះវិបត្តិទាំងនេះ ពលករខ្មែរមួយចំនួន បានបង្ខំចិត្តរកវិធីដើម្បីវិលត្រឡប់ទៅធ្វើការនៅប្រទេសថៃវិញ។ ក៏ប៉ុន្តែដោយសារច្រកព្រំដែនត្រូវបានបិទ ពួកគេបានបង្ខំចិត្តលួចឆ្លងដែនខុសច្បាប់ តាមច្រកធម្មជាតិ នៅតាមបណ្ដោយព្រំដែននៅក្នុងខេត្តត្រាត (Trat) ចន្ទបុរី(Chanthaburi) និងស្រះកែវ (Sakeo) ដែលបណ្ដាលឱ្យពួកគេត្រូវអាជ្ញាធរថៃចាប់ខ្លួនជាបន្តបន្ទាប់។
អង្គការរបស់ថៃដដែល បានបង្ហាញថា ក្នុងចំណោមពលករខ្មែរដែលឆ្លងដែនខុសច្បាប់ មានអ្នកខ្លះបានឆ្លងដែនចូល ហើយត្រូវអាជ្ញាធរចាប់បញ្ជូនចេញពីប្រទេសចុះឡើង រហូតដល់ ៤ដង ដោយរាល់ពេលត្រូវចាប់ខ្លួនម្ដងៗ អាជ្ញាធរបានប្រមូល និងជំរិតទារប្រាក់ពីពួកគេ មុននឹងត្រូវដឹកបញ្ជូនត្រឡប់ទៅកម្ពុជាវិញ។
ទោះជាយ៉ាងណា អ្នកសម្របសម្រួលបណ្ដាញពលករចំណាកស្រុក (MWG) លោក អាឌីសន កើតមង្គល(Adisorn Kerdmongkol) បានលើកឡើងថា ករណីខ្លះ អាជ្ញាធរថៃ និងពលករខ្មែរ បានស្ម័គ្រចិត្តបង្កើតអំពើពុករលួយជាមួយគ្នា ដើម្បីទទួលបានផលប្រយោជន៍រៀងៗខ្លួន ព្រោះពលករខ្លះ ចង់ទៅធ្វើការជាមួយថៅកែចាស់របស់ខ្លួនវិញ ដោយសារមានសេចក្ដីទុកចិត្ត និងការធានា ក៏ប៉ុន្តែខ្លះទៀត ត្រូវអាជ្ញាធរចាប់ខ្លួនបញ្ជូនមកកម្ពុជាវិញ និងមួយចំនួនទៀត មិនអាចរកការងារបានធ្វើនោះឡើយ ដោយសារការរើសអើង ដែលកើតចេញពីបញ្ហាគំនិតជាតិនិយម។
លោក អាឌីសន កើតមង្គល ជរុញឱ្យរដ្ឋាភិបាលកម្ពុជា និងថៃ ចរចាបើកច្រកព្រំដែនឡើងវិញ ដោយសារភាគីទាំងពីរជាប្រទេសជិតខាង ហើយត្រូវតែស្វែងរកមធ្យោបាយ ដើម្បីរួមរស់ជាមួយគ្នា។ លោករំពឹងថា បន្ទាប់ពីការបោះឆ្នោតហើយ រដ្ឋាភិបាលថៃថ្មី នឹងដាក់ចេញនូវគោលនយោបាយច្បាស់លាស់ ដើម្បីទទួលយកពលករខ្មែរឡើងវិញ បើមិនដូច្នោះទេ ការរត់ពន្ធកម្លាំងពលកម្មពីក្រៅប្រទេស នឹងត្រឡប់ទៅរកប្រព័ន្ធចាស់ឡើងវិញ ដោយមន្ត្រីអាជ្ញាធរ នឹងប្រើប្រាស់ប្រព័ន្ធបង់ប្រាក់ក្រោមតុ ពីក្រុមពលករផង និងថៅកែផង។
ជុំវិញរឿងនេះ មន្ត្រីគម្រោងផ្នែកការពារសិទ្ធិពលករចំណាកស្រុកប្រចាំប្រទេសថៃ នៃអង្គការសង់ត្រាល់ លោក លឹង សុផុន លើកឡើងថា គិតមកដល់ពេលនេះ រដ្ឋាភិបាលថៃ នៅមិនទាន់អនុលោមឱ្យពលករខ្មែរ អាចបន្តសុពលភាពវីសា ឬប័ណ្ណការងារនៅឡើយទេ ខណៈពលករខ្មែរ ចំនួនជាង ១សែន ៤ម៉ឺននាក់ នឹងត្រូវអស់សុពលភាពវីសា នៅដំណាច់ខែមីនា ឆ្នាំ២០២៦ នេះ។
លោក លឹង សុផុន៖ «កត្តានេះហើយដែលធ្វើឱ្យពួកគាត់ព្រួយបារម្ភច្រើន។ អ្នកខ្លះមានកូនរៀននៅប្រទេសថៃ ហើយនៅពេលឪពុកម្ដាយអស់សុពលភាពវីសា អ៊ីចឹងពួកគាត់រស់នៅក្នុងប្រទេសថៃអត់បានទេ អ៊ីចឹងពួកគាត់ ក៏មិនអាចរៀននៅក្នុងប្រទេសថៃបានដែរ»។
អ្នកនាំពាក្យក្រសួងការងារ លោក ស៊ុន មេសា បានប្រកាសនៅពេលថ្មីៗនេះថា គិតត្រឹមពេលនេះ ក្រសួងការងារ បានរៀបចំវេទិកាការងារចំនួនជាង ៥រយលើកមកហើយ នៅតាមភូមិស្រុក ដើម្បីផ្ដល់ឱកាសការងារដល់ពលរដ្ឋខ្មែរ ជាពិសេសសម្រាប់អតីតពលករខ្មែរដែលត្រឡប់មកពីប្រទេសថៃ ក្នុងនោះ ពលរដ្ឋខ្មែរជាង ៦សែននាក់ទទួលបានការងារធ្វើ។
ទោះជាយ៉ាងណា ពលករខ្មែរមួយចំនួន បានអះអាងថា ពួកគាត់នៅតែមិនអាចរកការងារធ្វើនៅក្នុងស្រុកបាននៅឡើយ ខណៈការងារមួយចំនួនខុសនឹងជំនាញខ្លះទៀត ត្អូញត្អែរថា កម្រៃពលកម្មការងារនៅក្នុងស្រុក មានចំនួនតិចតួច ដែលធ្វើឱ្យពួកគាត់ជួបបញ្ហាជីវភាព និងខ្លះទៀត ត្រូវថៅកែមិនបើកប្រាក់ឈ្នួលឱ្យជាដើម៕