ខ្មែរម្នាក់នៅកូរ៉េត្រូវបានថៅកែធ្វើបាប និងមិនបើកប្រាក់ឈ្នួលឲ្យគ្រប់ចំនួន
កូរ៉េៈ ស្ត្រីពលករខ្មែរម្នាក់ដែលកំពុងធ្វើការនៅប្រទេស កូរ៉េខាងត្បូង បានអះអាងថា នាងត្រូវថៅកែស្រីធ្វើបាប និងមិនបើកប្រាក់ឈ្នួលឲ្យគ្រប់ចំនួន ទៅតាមកម្លាំងពលកម្ម ហើយនាងបានអំពាវនាវឲ្យមានការជួយអន្តរាគមន៍ឲ្យនាងបានទៅធ្វើការនៅកន្លែងផ្សេង។
កញ្ញា រីម ស្រីរ៉ុម ដែលធ្វើការគិតជាប្រាក់ម៉ោងបានប្រាប់ភ្នំពេញប៉ុស្តិ៍កាលពីថ្ងៃចន្ទថា ថៅកែរបស់នាងបានរុញច្រាននាងជេរស្តី និងមិនឱ្យនាងពាក់មួក និងពាក់ស្រោមដៃសម្រាប់ទប់ទល់នឹងអាកាសធាតុដែលត្រជាក់ខ្លាំងនោះទេ។ ថៅកែក៏បានយកកន្ត្រកសម្រាប់ដាក់បន្លែរុញលើជើងនាងបណ្តាលឱ្យមានស្នាមជាំផងដែរ។
កញ្ញា រីម ស្រីរ៉ុម ថ្លែងថា៖ «ខ្ញុំពិបាកខ្លាំងណាស់រាល់ថ្ងៃនេះ។ ខ្ញុំខំប្រឹងធ្វើការដែរតែថៅកែអត់ពេញចិត្ត ព្រោះអីខ្ញុំទើបនឹងមកថ្មី។ ខ្ញុំបេះ (បន្លែ) អត់បាន ១ ៧០០ (ទៅ) ១ ៨០០ (ក្នុង ១ ថ្ងៃ) ដូចអ្នកចាស់អ៊ីចឹងណា។ ខ្ញុំអាចបេះបាន ១ ០០០។ អ៊ីចឹងហើយទើបយាយ (ថៅកែ) ហ្នឹងគាត់រុញច្រានខ្ញុំ ចេះតែក្តៅចិត្តជាមួយខ្ញុំ»។
កញ្ញាបានបន្ថែមថា៖ «គាត់ដេញឱ្យខ្ញុំទៅដេក អត់ឱ្យខ្ញុំធ្វើការ។ ថ្ងៃណា គាត់ពេញចិត្តឱ្យធ្វើការ គាត់ដេញឱ្យទៅធ្វើការតាំងពីម៉ោង ១២ កន្លះថ្ងៃ ខណៈម៉ោងត្រូវចូលធ្វើការម៉ោង ១។ ថៅកែហ្នឹងគាត់អត់យល់ទេ។ គាត់ថា យើងធ្វើម៉េចឱ្យតែបានទៅធ្វើការឱ្យគាត់។ តាមពិតវាអត់ទាន់ដល់ម៉ោង»។
កញ្ញា ស្រីរ៉ុម ដែលបម្រើការងារខាងផ្នែកកសិកម្មបញ្ជាក់ថាកញ្ញាចង់បានអ្នកប្រឹក្សាយោបល់ម្នាក់ដែលអាចជួយឱ្យកញ្ញាបានចាកចេញពីកន្លែងការងារបច្ចុប្បនេះដោយស្របច្បាប់ដោយមិនអស់ប្រាក់ ឬអស់ប្រាក់តិចតួច ហើយទៅរកការងារធ្វើនៅកន្លែងផ្សេង។
កញ្ញាថា ការងារនៅប្រទេស កូរ៉េ មិនសូវជាហត់នឿយប៉ុន្មាននោះទេ។ ទោះបីជាហត់នឿយ ក៏ត្រូវទ្រាំដែរ ព្រោះប្រាក់ខែនៅទីនោះក៏ទទួលបានខ្ពស់ដែរ។ «សំខាន់ឱ្យតែថៅកែយល់ចិត្តយើង។ យើងទើបមកថ្មី។ យើងប្រាប់ថា យើងអត់ចេះអីទេ។ យើងអត់ដែលធ្វើអាហ្នឹងនៅខ្មែរហើយយើងនឹងខំប្រឹងប្រែង»។
កញ្ញា ស្រីរ៉ុម បន្តថា ក្រោយកញ្ញាចូលធ្វើការបានរយៈពេល ៤២ ថ្ងៃ ហើយដល់ថ្ងៃបើកប្រាក់ឈ្នួលថៅកែមិនបានបើកប្រាក់ឈ្នួលនោះឱ្យនាងគ្រប់ចំនួននោះទេ។ ថៅកែបានបើកប្រាក់ឈ្នួលឱ្យនាងបានតែ ៦៣០ ០០០ វ៉ុនប៉ុណ្ណោះ (ជាង ៥០០ ដុល្លារ) ដែលកញ្ញាអះអាងថា កញ្ញាត្រូវទទួលប្រាក់ឈ្នួលក្នុងរយៈពេលនេះរហូតដល់ទៅជាង ១ ០០០ ដុល្លារអាមេរិក។
កញ្ញាបានបន្ថែមថា៖ «គាត់ (ថៅកែ) និយាយថាបើសិនជាខ្ញុំនៅតែធ្វើការអត់បានល្អឱ្យគាត់ទៀត គាត់នឹងស៊ីញ៉េដេញខ្ញុំចេញ។ បន្ទាប់មកទៀតខ្ញុំប្រាប់ថា ខ្ញុំចង់ចេញ ខ្ញុំចង់ចេញ គាត់ទារ ៨០០ ០០០ វ៉ុនកូរ៉េ (ជាង ៦០០ ដុល្លារអាមេរិក)»។
លោក ហេង សួរ អ្នកនាំពាក្យក្រសួងការងារបានប្រាប់ភ្នំពេញប៉ុស្តិ៍កាលពីថ្ងៃចន្ទថា ទីប្រឹក្សាទទួលបន្ទុកពលកររបស់កម្ពុជាអមនៅស្ថានទូតនៅប្រទេស កូរ៉េខាងត្បួង ក៏ដូចជាស្ថានឯកអគ្គរាជទូតកម្ពុជាទាំងមូលនៅឯទីក្រុងសេអ៊ូល បានទទួលនូវព័ត៌មាននេះ ហើយក៏កំពុងស៊ើបអង្កេតករណីនេះជាមួយនឹងអាជ្ញាធរប្រទេសកូរ៉េ។
លោក ឃុន ថារ៉ូ អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារនិងសិទ្ធិមនុស្សហៅកាត់ថា សង់ត្រាល់ បានប្រាប់ភ្នំពេញប៉ុស្តិ៍កាលពីថ្ងៃចន្ទថា ពលករគួរស្វែងរកជំនួយនៅនាយកដ្ឋានអធិការកិច្ចរបស់កូរ៉េ និងស្ថានទូតកម្ពុជានៅប្រទេសកូរ៉េដែលកន្លងមកមានការផ្តល់សេវាប្រសើរដែលមានផ្តល់លេខទូរស័ព្ទហតឡាញ (Hotline) សម្រាប់ទំនាក់ទំនង។
លោក ឃុន ថារ៉ូ បន្ថែមថា៖ «នៅក្នុងក្របខ័ណ្ឌបញ្ជូន (ពលករ) ក្រសួង (ការងារ) អាចត្រួតពិនិត្យ និងអធិការកិច្ចទៅនឹងទីភ្នាក់ងារបញ្ជូនហ្នឹងទៅ។ បញ្ជូនគាត់ទៅក្រុមហ៊ុនណា? មួយណាច្បាស់លាស់។ ទីតាំង និងទីកន្លែង (ណា?) ព្រោះគាត់ (ក្រសួង) មានព័ត៌មានទាំងអស់នេះ…។ ប្រសិនជាគាត់ (ក្រសួង) មានស្ថានទូតនៅទីនោះ។ គាត់ធ្វើការជិតស្និទ្ធជាមួយគ្នាអ៊ីចឹង ខ្ញុំគិតថាគាត់អាចអន្តរាគមន៍បាន»៕
ប្រភព៖ ភ្នំពេញប៉ុស្តិ៍
This post is also available in: អង់គ្លេស
