ព្រឹត្តិការណ៍សង្ខេប (កម្មវិធីប្រារព្ធខួប៣ឆ្នាំនៃការបាញ់សម្លាប់លោកបណ្ឌិត កែម ឡី) ១០ កក្កដា ឆ្នាំ២០១៩

ថ្ងៃទី០៩ ខែកក្កដា ឆ្នាំ២០១៩៖ 

យុវជន គង់​ រ៉ៃយ៉ា អតីតអ្នកទោសនយោបាយ រួមទាំងសាច់ញាតិ របស់គាត់៣នាក់ផ្សេងទៀត រួមទាំងប្រពន្ធរបស់គាត់ បងថ្លៃ ត្រូវបានចាប់ខ្លួន ដោយសារការផុសលក់អាវយឺតមាន រូប លោក បណ្ឌិតកែម ឡី នៅលើបណ្តាញ សង្គម (​Facebook) និងបានបង្ហាញពីព្រឹត្តិការណ៍ ការបាញ់សម្លាប់លោកបណ្ឌិត ​កែម ឡី។ បច្ចុប្បន្ននេះ អ្នកទាំងអស់នោះកំពុងស្ថិតនៅ ក្នុងស្នងការប៉ូលីសក្រុង​ភ្នំពេញ ដោយលើកទ្បើងថាក្រុមគាត់បានធ្វើការ ញុះញ៉ង់ ប៉ុន្តែមិនទាន់មានការចោទប្រកាន់ជាផ្លូវការនៅឡើយទេ។ 

ថ្ងៃទី១០ ខែកក្កដា ឆ្នាំ២០១៩៖ 

នៅស្ថានីយ៍ ហ្គារ៉ាស់សាំង កាល់តិច​ ( Caltex Mart) ស្តុបបូកគោ យុវជន៣នាក់ ត្រូវបានឃាត់ខ្លួន នៅនឹងកន្លែងប្រារព្ធ កម្មវិធីរំលឹកខួប ៣ឆ្នាំនៃការបាញ់សម្លាប់លោក បណ្ឌិត កែម​ ឡី ស្របពេលជាមួយគ្នានេះដែរ អាជ្ញាធរ បានយកបាច់ផ្ការបស់អ្នកចូលរួមបោកកំទេចចោល។ យុវជន ១រូប ត្រូវបានគេស្គាល់ថា ជាប្អូនធម៌ លោកបណ្ឌិត កែម ឡី ឈ្មោះ សួង នាគព័ន្ធ រួមទាំងយុវជនពីរនាក់ផ្សេងទៀត ជាបងប្អូនភ្លោះ ឈ្មោះ ជុំ ហួត និង ជុំ ហួរ ត្រូវបានបញ្ជូនទៅខណ្ឌចំការមក។ ការចាប់ខ្លួននេះ គឺដោយសារ យុវជន ទាំងនោះ បានចែកចាយក្រដាសខិត្តប័ណ្ណ  ដែលមានអត្ថន័យថា​ បញ្ឈប់ការសម្លាប់មនុស្សក្រៅច្បាប់។  

សង្គមស៊ីវិល សហជីព និងយុវជនផ្សេងៗទៀតប្រមាណ​ជា៧០ ទៅ ៨០ នាក់ ត្រូវបានប៉ូលីសបង្ខំមិនអោយស្ថិតនៅផ្តុំគ្នាចាប់ពីបីនាក់ឡើងទៅ ហើយត្រូវបង្ខំអោយចូលទៅខាងក្នុងទីតាំងការ៉ាស់សាំង ម៉ាត (Caltex Mart) ស្តុបបូកគោទាំងអស់ តែមិនអនុញ្ញាតិអោយនាំយកបាច់ផ្កាទៅដាក់ នៅទីនោះឡើយ។ 

លោក ទឹម ម៉ាឡៃ ប្រធានសមាគមបណ្តាញយុវជនកម្ពុជា (CYN)​ ពាក់អាវយឺតដែលមានរូបបណ្ឌិត កែម ឡី ត្រូវបានអាជ្ញាធរ បង្ខំអោយដោះអាវចេញផងដែរ។  ភ្លាមៗនោះ អាជ្ញាធរបានចូលទៅខាងក្នុងម៉ាត (Caltex Mart) បានធ្វើការហាមឃាត់ ក្រុមអង្គការសង្គមស៊ីវិល សមាគម សហជីព ដែលអង្គុយក្នុងម៉ាត Caltex Mart ដែលកំពុងរៀបចំកាហ្វេ ផ្កាម្ល៉េះដាក់នៅទីនោះ យកទៅបោះចោល​។​ ជាមួយគ្នានេះដែរ​លោក យាយ ម៉ាមី ដែលជាសកម្មជនសហគមន៍ដីធ្លី បឹងកក់  បានមកដល់មុខ Caltex Mart ភ្លាមៗនោះ​ អាជ្ញាធរមួយក្រុមធំ បានក្រៀកលោក យាយ ម៉ាមី រួចក៏នាំលោកយាយអោយចេញឆ្ងាយពីទីនោះ។ ពួកគេមិនអនុញ្ញាតិឲ្យលោកយាយចូលខាងក្នុងបរិវេណ Caltex Mart ឡើយ។ 

ដោយទ្បែកមេដឹកនាំ និង សកម្មជន​គណបក្សប្រជាធិបតេយ្យមូលដ្ឋាន ក៏ត្រូវបាន អាជ្ញាធរចំរុះធ្វើការហាមឃាត់ ក្នុងគោលបំណងយកកំរងផ្កាទៅដាក់ដើម្បីគោរព វិញ្ញាណខ្ខន្ធ លោក បណ្ឌិត កែម​ទ្បី។

This post is also available in: អង់គ្លេស