ប្រភព៖ ខេមបូចា
មនុស្សរាប់រយនាក់បានសម្រុកប្រជ្រៀតគ្នាដាក់ពាក្យសុំធ្វើការនៅកាស៊ីណូមួយឈ្មោះ យ៉ាឌូលី ដែលស្ថិតនៅកណ្តាលក្រុងព្រះសីហនុ នៅថ្ងៃទី៣០ ខែកក្កដា ឆ្នាំ២០២៦ ក្រោយកាស៊ីណូមួយនេះប្រកាសរើសបុគ្គលិក ចំពេលពួកគេគ្មានការងារធ្វើជាច្រើនខែ ចាប់តាំងពីអំឡុងដើមឆ្នាំ២០២៦ដែលមានការបង្ក្រាបទីតាំងឆបោកតាមអនឡាញក្នុងខេត្តនេះមក។
ក្រុមអ្នកទៅដាក់ពាក្យធ្វើការ បានបញ្ជាក់ថា ពួកគេប្រមូលផ្តុំគ្នាឈរចាំដាក់ពាក្យធ្វើការនៅមុខកាស៊ីណូ យ៉ាឌូលី កកកុញទាំងមេឃកំពុងភ្លៀងផងនោះ ក្រោយឃើញកាស៊ីណូមួយនេះ ប្រកាសជ្រើសរើសបុគ្គលិកចម្រុះតួនាទីសរុបជាង១៥០នាក់ ដែលភាគច្រើនរើសផ្នែកចែកបៀរ។ ពួកគេចាត់ទុកថាជាឱកាសកម្រ ព្រោះក្រុងព្រះសីហនុបច្ចុប្បន្នគ្មានឱកាសការងារត្រូវជំនាញរបស់ពួកគេដូចពីមុនឡើយ ដោយពួកគេខ្លះថាស្ទើរតែគ្មានលុយទិញបាយហូប។
កញ្ញា ជា មីនា ជាយុវតីម្នាក់ក្នុងចំណោមមនុស្សជាច្រើននាក់ទៀត ដែលបានទៅប្រជ្រៀតគ្នាចាំដាក់ពាក្យសុំធ្វើការងារនៅកាស៊ីណូខាងលើ។ ក៏ប៉ុន្តែនាងមិនអាចដាក់ពាក្យបានតាមបំណងឡើយ ទោះបីទៅរង់ចាំតាំងពីព្រឹករហូតដល់ពេលល្ងាចក៏ដោយ។
កញ្ញា មីនា បាននិយាយថា៖ «ពេលព្រឹកទៅចាំម្តង ហើយពេលថ្ងៃទៅចាំម្តងទៀត តែគេថាអត់យក។ គេថាគេរើសពេញហើយ»។
កញ្ញាបន្តថា ការបង្ខំចិត្តទៅឈររង់ចាំជាច្រើនម៉ោងហើយត្រូវដណ្តើមគ្នាចូលបែបនេះ ដោយសារនាងពិបាករកការងារធ្វើពេក។ នេះជាលើកទី៧របស់នាង ដែលដាក់ពាក្យរកការងារនៅកន្លែងផ្សេងៗគ្នាក្នុងក្រុងព្រះសីហនុចាប់តាំងពីនាងឈប់ពីការងារជាអ្នកបម្រើសេវាកម្មនៅហាងម្ហូបអាហារមួយកាលពីអំឡុងខែកុម្ភៈ ដោយសារថៅកែបង្ខំឱ្យធ្វើការលើសកម្លាំង។
កញ្ញាបន្ថែមថា៖ «ពិបាកណាស់បង ពេលអត់ការងារធ្វើ! អត់មានលុយ! ដាច់បាយហើយ។ នៅកំពង់សោមអ្នកដាច់បាយច្រើនណាស់ ព្រោះអីអត់ការងារធ្វើ។ ដាក់ពាក្យទៅកន្លែងណាក៏អត់ជាប់ វាពិបាក។ ពេលខ្លះគេគ្រាន់តែផុស(ជ្រើសរើស)ចោល ដល់ពេលយើងទៅដាក់ពាក្យ តែគេអត់យក គេថាពេញ»។
ពាក់ព័ន្ធនឹងការប្រជ្រៀតគ្នាដាក់ពាក្យធ្វើការនៅកាស៊ីណូ យ៉ាឌូលី នេះដែរ មានគណនីហ្វេសប៊ុកជាច្រើនបានបង្ហាញការខកចិត្ត ដោយថាពួកគេខ្លះខំធ្វើដំណើរពីខេត្តផ្សេងទៅ ដើម្បីចង់បានការងារ តែត្រូវគេប្រាប់ឱ្យត្រឡប់ទៅវិញ។ ពួកគេក៏បានត្អូញត្អែរពីបញ្ហាជីវភាព និងតម្រូវការការងារ ដែលកំពុងបង្ខំឱ្យពួកគេស្វែងរកជាចាំបាច់។
ម្ចាស់គណនីហ្វេសប៊ុកមួយឈ្មោះ Neath Moni បានបញ្ចេញមតិថា គាត់បានចំណាយលុយមួយចំនួន ជាថ្នូរនឹងការចង់ចូលធ្វើការកាស៊ីណូខាងលើ។ ប៉ុន្តែលទ្ធផលគឺមិនដូចការសន្យា។
គាត់សរសេរថា៖ «ខំមកពីឆ្ងាយអស់ទឹកតែ៣០ដុល្លារ គេថាបានការងារធ្វើ។ បាញ់លុយឱ្យគេមុនឡើងដល់ ពេលឡើងមកដល់ឆាតលែងចូល តេលែងកើត ប្លុកចោលហ្មង ឈឺចិត្តនិយាយមិនចេញ»។
ពលរដ្ឋម្នាក់ទៀត បានប្រាប់សារព័ត៌មានខេមបូចា ដោយលក្ខខណ្ឌសុំមិនបញ្ចេញឈ្មោះព្រោះបារម្ភពីសុវត្ថិភាពថា លោកក៏បានទៅចូលរួមដាក់ពាក្យធ្វើការដែរ ប៉ុន្តែមិនមានអ្នកទទួលឡើយ។ លោកស្វែងរកការងារនេះ ដោយថា កាស៊ីណូដែលគាត់ទើបចូលធ្វើការបាន២ខែ បានចេញបញ្ជីឈ្មោះបុគ្គលិកដែលត្រូវជម្រុះចាប់ពីបំណាច់ខែកក្កដានេះទៅ ដោយមានទាំងឈ្មោះលោកផង ព្រោះតែភ្ញៀវថយចុះ។ មុនចូលធ្វើការនេះ លោកក៏គ្មានការងារធ្វើរយៈពេលប្រហែល១ឆ្នាំដែរ។
លោកនិយាយថា៖ «កាស៊ីណូបិទច្រើន ហើយកន្លែងខ្លះជម្រុះ(បុគ្គលិក)ខ្លះផង។ សូម្បីកន្លែងខ្ញុំធ្វើការឥឡូវក៏ជម្រុះដែរ។ ជម្រុះទាំងពួកខ្ញុំផង ជម្រុះទាំងខាងអ្នកចែកបៀរផង ជម្រុះទាំងខាងអ្នកបម្រើសេវាកម្មផង»។
លោកឱ្យដឹងទៀតថា ជីវភាពគាត់កំពុងធ្លាក់ចុះ ដោយថាការងារថ្មីក៏រកមិនទាន់បាន ហើយការងារចាស់ក៏គេមិនទាន់បើកប្រាក់ខែឱ្យ។ មិនតែប៉ុណ្ណោះ របររត់តាក់ស៊ីក្រៅម៉ោងរបស់គាត់ ក៏លែងមានភ្ញៀវជិះ ដោយថាបច្ចុប្បន្នក្រុងព្រះសីហនុបានក្លាយជាក្រុងដែលស្ងាត់មនុស្សមិនធ្លាប់មាន។ លោកកំពុងបារម្ភពីអនាគតគ្រួសាររបស់គាត់ដែលត្រូវចិញ្ចឹមម្តាយចាស់ កូនតូច និងតម្រូវការបង់ការប្រាក់ធនាគារជាង៣០០ដុល្លាររៀងរាល់ខែ។
លោកប្រាប់ថា៖ «បារម្ភរឿងធនាគារគាត់រឹបអូសយកទ្រព្យសម្បត្តិ ដោយសារយើងបង់មកច្រើនឆ្នាំហើយ»។
មិនមែនតែអ្នកអត់ការងារធ្វើទេដែលរអ៊ូ ប៉ុន្តែអាជីវករលក់ដូរមួយចំនួននៅខេត្តព្រះសីហនុក៏បានប្រាប់ពីទុក្ខលំបាករបស់ពួកគេ ដែលមិនអាចរកចំណូលផ្គត់ផ្គង់គ្រួសារបានដូចពីមុន ដោយសារខ្សត់អតិថិជន។ ពួកគេប្រាប់ថា ហាងលក់ម្ហូបអាហារ កាស៊ីណូ និងសណ្ឋាគារជាដើម ត្រូវបានបិទបណ្តើរៗ ចំណែកកន្លែងដែលនៅដំណើរការក៏លែងជ្រើសរើសបុគ្គលិកទៀតដែរ ដោយសារគ្មានភ្ញៀវបរទេស បន្ទាប់ពីមានការបង្ក្រាបការឆបោកតាមប្រព័ន្ធអនឡាញ។
របាយការណ៍ក្រសួងមហាផ្ទៃបង្ហាញថា ខេត្តព្រះសីហនុជារាជធានី-ខេត្តទី២ ដែលសមត្ថកិច្ចបង្ក្រាបទីតាំងឆបោកតាមអនឡាញបានច្រើនជាងគេ ក្នុងរយៈពេល៦ខែដំបូងនៃឆ្នាំ២០២៦។ ទីតាំងឆបោកតាមអនឡាញសរុបដែលសមត្ថកិច្ចបង្រ្កាបបានមានចំនួន ៤៨៨កន្លែង។ ក្នុងនោះរាជធានីភ្នំពេញមានចំនួន ១៣៩ទីតាំង និងខេត្តព្រះសីហនុមានចំនួន ១២៤ទីតាំង។
ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តព្រះសីហនុ លោក យ៉ូវ ខេមរា មានប្រសាសន៍ថា អ្នកធ្វើការក្នុងសេវាកម្មកាស៊ីណូមានតម្រូវការការងារច្រើន ដោយសារតែកាស៊ីណូលើសពាក់កណ្តាលក្នុងខេត្តព្រះសីហនុត្រូវផ្អាកដំណើរការ ក្រោយមានយុទ្ធនាការបង្ក្រាបការឆបោកតាមអនឡាញ។
លោកថ្លែងថា៖ «យុទ្ធនាការបង្ក្រាបស្គេមអនឡាញ ធ្វើឱ្យកាស៊ីណូមានការថយចុះតម្រូវការកម្លាំងពលកម្ម។ ដើមឡើយ កាស៊ីណូដែលមានអាជ្ញាបណ្ណជិត១០០ទីតាំង។ ឥឡូវនៅសល់តែប្រមាណ៤០ទីតាំងទេ អ៊ីចឹងអាចប៉ះពាល់បាត់បង់ការងារខ្លះក្នុងវិស័យសេវាកម្មកាស៊ីណូ»។
យ៉ាងណា លោកបញ្ជាក់ថា ខេត្តព្រះសីហនុនៅសល់ការងារទំនេរប្រមាណ ១ ៥០០កន្លែងក្នុងមួយសប្តាហ៍ និងបណ្តាខេត្តផ្សេងៗក៏មានឱកាសការងាររាប់ម៉ឺនកន្លែង ដែលភាគច្រើនផ្នែកឧស្សាហកម្មកាត់ដេរ។ ក៏ប៉ុន្តែលោកកត់សម្គាល់ថា ពលរដ្ឋដែលធ្លាប់ធ្វើការក្នុងវិស័យសេវាកម្ម និងកាស៊ីណូ នៅតែចង់បន្តការងារនេះ ដោយសារប្រាក់ចំណូលខ្ពស់ និងការងារធូរស្រាលជាង បើធៀបនឹងការងារក្នុងវិស័យកាត់ដេរ។
អ្នកគ្រប់គ្រងកម្មវិធីការងារនៃអង្គការសង់ត្រាល់ លោក ឃុន ថារ៉ូ ថ្លែងថា ការងារដែលមិនត្រូវជំនាញជាឧបសគ្គដ៏ធំសម្រាប់ប្រជាពលរដ្ឋ។ លោកបន្តថា រដ្ឋាភិបាលគួរពង្រឹងការបណ្តុះបណ្តាលបច្ចេកទេសដល់ពលរដ្ឋ ដើម្បីឆ្លើយតបតម្រូវការទីផ្សារការងារ និងបង្កើនការទាក់ទាញវិនិយោគិនបរទេស។
លោក ថារ៉ូ បន្តថា ផលលំបាកនៃជីវភាព ការអត់ការងារធ្វើ និងបញ្ហាបំណុល អាចបង្ខំចិត្តឱ្យពលរដ្ឋជ្រើសយកជម្រើសហានិភ័យ ដោយមិនបានគិតដិតដល់។
លោកមានប្រសាសន៍ថា៖ «សម្ពាធនៃការស្វែងរកការងារធ្វើ ប្រាក់ចំណូល ការចំណាយប្រចាំថ្ងៃ បញ្ហាបំណុលនេះ វានឹងអាចជះឥទ្ធិពលដល់ពួកគាត់នៅក្នុងការសម្រេចចិត្ត ឬក៏បង្ខំចិត្តទៅធ្វើការងារណាមួយដែលនៅក្នុងស្ថានភាពមួយដែលមានហានិភ័យ ឬក៏អាចថាបង្ខំចិត្តពួកគាត់ឱ្យចំណាកស្រុក»។
លោក ថារ៉ូ ណែនាំឱ្យពលរដ្ឋប្រុងប្រយ័ត្នចំពោះការស្វែងរកការងារ ដើម្បីធានាថាកន្លែងការងារស្របច្បាប់ និងគោរពសិទ្ធិការងារ។
លោកបានបន្ថែមថា៖ «ពលរដ្ឋខ្មែរយើង គួរតែប្រយ័ត្នដែរ ដើម្បីកំណត់ថាតើការងារហ្នឹងវាមានកម្រិតហានិភ័យប៉ុណ្ណា? មានភាពច្បាស់លាស់ប៉ុណ្ណា? កាស៊ីណូហ្នឹងជាប្រភេទកាស៊ីណូដែលមានចុះបញ្ជីត្រឹមត្រូវ? មានការចុះអធិការកិច្ចត្រឹមត្រូវតាមប្រភេទការងារជាដើម។ ចៀសវាងរងការកេងប្រវ័ញ្ចកម្លាំងពលកម្ម ឬក៏អាចស្ថិតក្នុងជនរងគ្រោះដែលគេអូសទាញធ្លាក់ក្នុងប្រព្រឹត្តសកម្មភាព និងការងារដែលខុសច្បាប់»៕