ថៃនឹងបញ្ជូនពលករខ្មែរ១៧នាក់ដែលល្មើសបម្រាមទៅតុលាការ បើគ្មានប្រាក់៤ម៉ឺនបាតបង់ថ្លៃពិន័យ
ក្រសួងការបរទេសកម្ពុជាបានឱ្យដឹងថា ពលករខ្មែរ ១៧នាក់ ដែលត្រូវបានអាជ្ញាធរថៃចាប់ខ្លួន ដោយសារការបំពានបម្រាមច្បាប់ក្នុងគ្រាអាសន្ន ដោយហាមមិនឱ្យពលរដ្ឋជួបជុំផឹកស្រាក្នុងឱកាសបុណ្យចូលឆ្មាំថ្មី នឹងត្រូវបញ្ជូនទៅតុលាការដើម្បីជំនុំជម្រះបន្ត ប្រសិនបើពួកគេគ្មានប្រាក់បង់ពិន័យចំនួន ៤ម៉ឺនបាត ឬ ស្មើជាង ១២០០ដុល្លារសហរដ្ឋអាមេរិកសម្រាប់មនុស្សម្នាក់ទេនោះ។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ថា ការអនុវត្តបម្រាមដាក់ប្រទេសក្នុងគ្រាអាសន្ន ដោយហាមមិនឱ្យមានការជួបជុំសេពគ្រឿងស្រវឹងរបស់រដ្ឋាភិបាលថៃ គឺធ្វើឡើងជាទូទៅ សម្រាប់គ្រប់ជនជាតិទាំងអស់ដែលរស់នៅ និងធ្វើការងារក្នុងប្រទេសថៃ រួមទាំងជនជាតិថៃខ្លួនឯងផងដែរ។
លោកបន្តថា ជនល្មើសបម្រាមនេះ ដែលសមត្ថកិច្ចឃាត់ខ្លួន នឹងត្រូវពិន័យជាប្រាក់ប្រមាណ ៤ម៉ឺនបាតសម្រាប់មនុស្សម្នាក់ ប៉ុន្តែ លោកថា មកទល់ពេលនេះ មិនទាន់មានពលករខ្មែរណាម្នាក់បានបង់ប្រាក់ពិន័យនោះនៅឡើយទេ។
លោកបន្ថែមថា នៅពេលពួកគាត់ទាំងនោះមិនទាន់បង់ប្រាក់ពិន័យ អាជ្ញាធរថៃនឹងរៀបចំសំណុំរឿងបញ្ជូនពួកគាត់ទៅតុលាការបន្តទៀត។
លោក កុយ គួង មានប្រសាសន៍ថា៖ «បាទ! នរណាដែលមិនបង់ប្រាក់ ចំពោះអ្នកណាដែលបង់ប្រាក់ រួចខ្លួន គេឱ្យត្រឡប់មកផ្ទះវិញ។ ប៉ុន្តែ នរណាដែលមិនបង់ ត្រូវតែឡើងទៅតាមនីតិវិធីរបស់តុលាការហើយបាទ។ ស្ថានទូតយើងក៏បានតាមដានយកចិត្តទុកដាក់ក្នុងរឿងហ្នឹងដែរបាទ។ អ្វីដែលយើងជួយបាន យើងតាមដាន យើងខំស្វះស្វែងរកមើលមេធាវី ដើម្បីឱ្យគាត់ទទួលបាននូវយុត្តិធម៌បាទ។ មានន័យថា សំខាន់តើការចោទប្រកាន់របស់គេហ្នឹងពិតជាត្រឹមត្រូវមែនឬអត់បាទ? កន្លងមក មិនទាន់ឮសូរថា មាននរណាបង់ [ប្រាក់ពិន័យ] ទេបាទ។ អីចឹង តុលាការកំពុងរៀបចំ [សំណុំរឿង] ទាំង ១៧នាក់ហ្នឹងតែម្តង។ អត់ទាន់ច្បាស់ទេ ព្រោះស្ថានទូតយើងកំពុងតាមដានព័ត៌មាននេះ ប៉ុន្តែ អត់ទាន់កំណត់ថា ឡើងទៅតុលាការពេលណាទេ»។
មន្ត្រីជាន់ខ្ពស់ក្រសួងការបរទេសដដែល ឱ្យដឹងទៀតថា ការល្មើសបម្រាមនេះ ដូចជាមិនបាននិយាយដល់រឿងដាក់ពន្ធនាគារទេនៅពេលឡើងទៅដល់តុលាការនោះ ដោយតុលាការនឹងបង្គាប់ឱ្យពួកគេត្រូវតែបង់ប្រាក់ពិន័យនេះ ប្រសិនបើតុលាការរកឃើញថា ពលករខ្មែរ ១៧នាក់នោះ ពិតជាបានល្មើសបម្រាមច្បាប់ដាក់ប្រទេសក្នុងគ្រាអាសន្នរបស់គេប្រាកដមែន។
បើតាមលោក កុយ គួង បញ្ជាក់ថា មកទល់ពេលបច្ចុប្បន្ន ពលករខ្មែរទាំងនោះស្ថិតនៅក្រោមការគ្រប់គ្រងរបស់សមត្ថកិច្ចថៃ ក្នុងខេត្តផាធុមថានី ហើយមន្ត្រីស្ថានទូតខ្មែរកំពុងតាមដានករណីនេះជាប្រចាំ។
កាលពីថ្ងៃទី១២ ខែមេសា រដ្ឋាភិបាលថៃបានដាក់បម្រាមលើការលក់គ្រឿងស្រវឹង ឬសេពគ្រឿងស្រវឹង ព្រមទាំងបញ្ជាឱ្យបិទហាង ឬដេប៉ូលក់ស្រា និងស្រាបៀរនៅទូទាំងប្រទេសថៃ ក្នុងអំឡុងរដូវបុណ្យចូលឆ្នាំថ្មី ដើម្បីបញ្ចៀសការជួបជុំ និងប្រមូលផ្តុំគ្នាផឹកគ្រឿងស្រវឹង ដែលនាំឱ្យមានការរីករាលដាលនៃកូវីដ១៩។
យ៉ាងនេះក្តី ពីរថ្ងៃក្រោយដាក់បម្រាមនេះ សមត្ថកិច្ចថៃខេត្តផាធុមថានី បានឃាត់ខ្លួនពលករខ្មែរប្រុសស្រីចំនួន ១៧នាក់ កាលពីល្ងាចថ្ងៃទី១៤ ខែមេសា ដោយសារពួកគេប្រមូលផ្តុំគ្នាផឹកគ្រឿងស្រវឹងនៅមុខបន្ទប់ជួលរបស់ខ្លួន។
សមត្ថកិច្ចថៃបញ្ជាក់ថា ការឃាត់ខ្លួនពលរដ្ឋខ្មែរនេះ ដោយសារពួកគេបានបំពានបម្រាមរបស់រដ្ឋាភិបាលថៃដែលហាមមិនឱ្យមានការជួបជុំសេពគ្រឿងស្រវឹងអំឡុងពេលចូលឆ្នាំថ្មី ដើម្បីទប់ស្កាត់ការរីករាលដាលនៃជំងឺកូវីដ១៩។
មន្ត្រីសម្របសម្រួលកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅថា សង់ត្រាល់(Central) លោក ឃុន ថារ៉ូ មានប្រសាសន៍ថា តួអង្គសំខាន់ដែលអាចដោះស្រាយបញ្ហាប្រឈមរបស់ពលករខ្មែរ ១៧នាក់នៅពេលនេះ គឺមានតែយន្តការសម្របសម្រួលរវាងរដ្ឋ និងរដ្ឋប៉ុណ្ណោះ ដោយថា តាមលទ្ធភាពបង់ប្រាក់ពិន័យចំនួន ៤ម៉ឺនបាតនោះ ពលករខ្មែរ នឹងមិនមានលទ្ធភាពនោះឡើយ។
លោកមានប្រសាសន៍ថា៖ «ហើយទឹកប្រាក់ប៉ុណ្ណឹង [៤ម៉ឺនបាត] ខ្ញុំគិតថា ពួកគាត់អាចមិនមានលទ្ធភាពទេ ព្រោះទីមួយ គាត់បាត់បង់ការងារ គាត់អត់មានចំណូល ហើយកម្មករខ្លះគាត់ជាកម្មករធ្វើការងារក្រៅប្រព័ន្ធ ដែលមិនបានទឹកប្រាក់គាំពារ ៥០ភាគរយពីរដ្ឋនៅក្នុងប្រទេសថៃនោះទេ។ អីចឹង គាត់ប្រឈមទៅនឹងបញ្ហាសេដ្ឋកិច្ចហ្នឹងមួយផ្នែកហើយ តែកាលៈទេសៈនេះ ប្រសិនបើតុលាការថៃគេចាត់វិធានការទៅតាមបណ្តឹងរបស់អាជ្ញាធរថៃ។ ខ្ញុំគិតថា វាគួរតែរដ្ឋ និងរដ្ឋ មានការសម្របសម្រួលគ្នាអីចឹងទៅ។ ក្រសួងការបរទេស និងក្រសួងការបរទេស ខ្ញុំគិតថាមានតែវិធានការហ្នឹងទេ »។
កាលពីថ្ងៃទី១៥ ខែមេសា លោកនាយករដ្ឋមន្ត្រី ហ៊ុន សែន បានអំពាវនាវទៅពលករ-ពលការិនី ដែលកំពុងរស់នៅ និងធ្វើការងារនៅក្រៅប្រទេស ជាពិសេសនៅប្រទេសថៃ ឱ្យគោរពតាមច្បាប់ និងបទបញ្ញត្តិទាំងឡាយដែលប្រទេសគេបានដាក់ចេញ រួមទាំងច្បាប់បម្រាមគោលចរ និងបម្រាមជួបជុំគ្នាជាក្រុម ឬជប់លៀងជាក្រុម ដោយថា ប្រទេសគេកំពុងមានការហាមឃាត់តឹងរ៉ឹងបំផុតក្នុងការទប់ស្កាត់ការចម្លងមេរោគកូវីដ-១៩។
បន្ថែមពីនេះ លោកក៏បានអំពាវនាវឱ្យពលរដ្ឋដែលកំពុងរស់នៅ និងធ្វើការងារនៅក្រៅប្រទេស សូមកុំធ្វើអ្វីដែលខុសច្បាប់ឱ្យសោះនៅក្នុងប្រទេសដែលកំពុងដាក់ក្នុងគ្រាអាសន្ននោះ៕
ប្រភព៖ VOD
