សង្គមស៊ីវិលស្នើលោក ស ខេង បញ្ឈប់ប្រតិបត្តិការចុះស្រង់ស្ថិតិរបស់អាជ្ញាធរខណ្ឌមានជ័យ
ក្រុមអង្គការសង្គមស៊ីវិលធ្វើការផ្តោតលើការលើកកម្ពស់សិទ្ធិមនុស្ស និងសិទ្ធិការងារ បានស្នើទៅរដ្ឋមន្ត្រីក្រសួងមហាផ្ទៃ លោក ស ខេង ឱ្យបញ្ឈប់ប្រតិបត្តិការរបស់អាជ្ញាធរខណ្ឌមានជ័យ ដែលបានជូនដំណឹងពីការចុះធ្វើបច្ចុប្បន្នភាពស្រង់ស្ថិតិបុគ្គលិកខ្លួន ដោយហៅបេសកកម្មនោះថា រំលោភលើគោលការណ៍ច្បាប់។
ការស្នើរបស់ក្រុមអង្គការសង្គមស៊ីវិលនេះ ធ្វើឡើងតាមរយៈលិខិតរួមគ្នាមួយចុះថ្ងៃអង្គារនេះ ដែលត្រូវបានផ្ញើទៅក្រសួងមហាផ្ទៃ អគ្គស្នងការដ្ឋាននគរបាលជាតិ និងអធិការដ្ឋាននរគបាលខណ្ឌមានជ័យ។
អង្គការសមាគមទាំងនោះមាន មជ្ឈមណ្ឌលសម័ន្ធភាពការងារ និងសិទ្ធិមនុស្ស ហៅសង់ត្រាល់ សហភាពការងារកម្ពុជា សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងសម្ព័ន្ធសហគមន៍កសិករកម្ពុជា ជាដើម។
ពួកគេនិយាយថា នៅដើមខែកញ្ញាកន្លងទៅថ្មីៗនេះ ស្ថាប័នពួកគេដែលមានការិយាល័យស្ថិតនៅខណ្ឌមានជ័យ រាជធានីភ្នំពេញ ត្រូវបានជូនដំណឹងពីអធិការដ្ឋាននរគបាលខណ្ឌមានជ័យ អំពីការចុះស្រង់ស្ថិតិបុគ្គលិកទាំងខ្មែរទាំងបរទេស ដែលកំពុងបម្រើការងារក្នុងស្ថាប័នរបស់ខ្លួន ដើម្បីធ្វើបច្ចុប្បន្នភាព។
ក្រុមអង្គការនិយាយទៀតថា អាជ្ញាធរក៏តម្រូវឱ្យផ្តល់ទិន្ន័យដូចជាអត្តសញ្ញាណប័ណ្ណសញ្ជាតិខ្មែរ លិខិតឆ្លងដែនបុគ្គលិកខ្មែរ ទិដ្ឋាការរបស់ជនបរទេស ប័ណ្ណព័ត៌មានផ្សេងៗទៀត រចនាសម្ព័ន្ធរបស់ស្ថាប័ន រួមទាំងរូបថតបុគ្គលិកខ្មែរ និងបរទេស។
ក្រុមអង្គការនិយាយថា បេសកកម្មរបស់អាជ្ញាខណ្ឌមានជ័យនេះ គឺជាប្រតិបត្តិការផ្ទុយនឹងគោលការច្បាប់ស្តីពីសមាគម និងអង្គការមិនមែនរដ្ឋាភិបាល ត្រង់មាត្រា១០ ផ្ទុយនឹងច្បាប់ស្តីពីសហជីពត្រង់មាត្រា១៣ និងដោយឡែកមាត្រា១៧។
ពួកគេថា៖ «ការស្នើសុំផ្ទុយពីគោលការណ៍ច្បាប់ធ្វើឱ្យយើងខ្ញុំមានការព្រួយបារម្ភយ៉ាងខ្លាំង ពីការរំខានយាយីរបស់អាជ្ញាធរថ្នាក់ក្រោមជាតិមកលើ សហជីព សមាគម និងអង្គការក្រៅរដ្ឋាភិបាលដែលទទួលបាននូវនីតិសប្បទាតាមច្បាប់ស្តីពីសមាគម និងអង្គការមិនមែនរដ្ឋាភិបាលក្នុងការការពារសិទ្ធិ សេរីភាព និងផលប្រយោជន៍ស្របច្បាប់របស់ខ្លួន»។
វីអូឌីមិនអាចទាក់ទងអ្នកនាំពាក្យក្រសួងមហាផ្ទៃ លោក ខៀវ សុភ័គ បានទេគិតត្រឹមម៉ោងផ្សាយនេះ ដោយទូរស័ព្ទរបស់លោកគ្មានអ្នកទទូល។
ប៉ុន្តែ អធិការនរគបាលខណ្ឌមានជ័យ លោក ម៉េង វិមានតារា អះអាងថា ការជូនដំណឹងពីការចុះធ្វើបច្ចុប្បន្នភាពស្ថិតិបុគ្គលិករបស់ក្រុមអង្គការទាំងនោះនាពេលកន្លងទៅ ត្រូវបានប្រកាសលុបចោលហើយ។
លោក ម៉េង វិមានតារា ប្រាប់ថា៖ «យើងអត់បានធ្វើអាហ្នឹងផង យើងមោឃភាពចោទហើយ»។
អ្នកជំនាញសិទ្ធិមនុស្សរបស់អង្គការសហប្រជាជាតិលោកស្រី រ៉ូណា ស្មីត កាលពីថ្ងៃទី៨កញ្ញា បាននិយាយនៅលើហ្វេសប៊ុកអ្នកស្រីថា គាត់មានកង្វល់ និងតាមដានយ៉ាងដិតដល់នូវរបាយការណ៍ដែលថា អង្គការសង្គមស៊ីវិលចំនួនប្រាំពីរផ្សេងគ្នាត្រូវបានគេស្វែងរក។ លោកស្រីថា សិទ្ធិសេរីភាពក្នុងការបញ្ចេញមតិ បង្កើតសមាគម និងការជួបជុំដោយសន្តិវិធី ត្រូវបានការពារដោយនិយាម និងបទដ្ឋានសិទ្ធិមនុស្សអន្តរជាតិ ក៏ដូចជារដ្ឋធម្មនុញ្ញកម្ពុជាផងដែរ និងលើកទឹកចិត្តដល់អាជ្ញាធរកម្ពុជា ឱ្យធានាថាសិទ្ធិទាំងនេះ។
អ្នកធ្វើការលើកម្ពស់សិទ្ធិមនុស្ស និងសិទ្ធិការងារទាំងនោះ ផ្តល់ជាយោបល់ថា ដើម្បីបង្កើននូវសហប្រតិបត្តិការរវាងរដ្ឋាភិបាល និងរដ្ឋបាលថ្នាក់ក្រោមជាតិ ជាមួយសមាគមនិងអង្គការមិនមែនរដ្ឋាភិបាល ក្រសួងមហាផ្ទៃគួរពិនិត្យ និងអន្តរាគមន៍ បញ្ឈប់បេសកម្មរបស់អាជ្ញាខណ្ឌមានជ័យនេះ ។
មន្ត្រីគ្រប់គ្រង់កម្មវិធីការងារនៅមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស លោក ឃុន ថារ៉ូ ឱ្យដឹងបន្ថែមថា ការដែលអាជ្ញាធរ ចង់បានព័ត៌មានពីបច្ចុប្បន្នភាពរបស់ក្រុមអង្គការសង្គមស៊ីវិល គួរសុំពីក្រសួងមហាផ្ទៃ ព្រោះអង្គការទាំងនោះបានផ្ញើរបាយការណ៍លម្អិតពីស្ថាព័នរបស់ខ្លួន ក្នុងនោះរួមទាំងរបាយការណ៍ហិរញ្ញវត្ថុផងដែរ ទៅក្រសួងមហាផ្ទៃរៀងរាល់ឆ្នាំ តបតាមច្បាប់ស្តីពីសមាគម និងអង្គការមិនមែនរដ្ឋាភិបាល។
លោកថា ការដែលអាជ្ញាធរបែជាជូនដំណឹងថា ចង់ចុះទៅពិនិត្យផ្ទាល់ដល់ស្ថាប័នពួកគេ វាជាទម្រង់គំរាមកំហែង ផ្ទុយពីគោលការណ៍ច្បាប់។
លោក ឃុន ថារ៉ូ ប្រាប់ថា៖ «យើងមើលថា អាហ្នឹងវាជាទម្រង់គម្រាមកំហែងហើយ។ អាហ្នឹង វាជាការជ្រៀតជ្រែកផ្ទៃក្នុងទៅនឹងការងាររបស់អង្គការសមាគមហើយ និងសហព័ន្ធសហជីព ព្រោះអាហ្នឹងយើងមានច្បាប់ស្តីពីសហជីព ស្តីពីការងាររួចហើយសម្រាប់សហព័ន្ធសហជីព ហើយលក្ខខណ្ឌដែលតម្រូវហ្នឹងទៀតសោធវាមានចែងនៅក្នុងច្បាប់ NGOs ហ្នឹងរួចហើយ»៕
ប្រភព៖ VOD
