ពលករខ្មែរធ្វើការនៅម៉ាឡេស៊ីប្រតិកម្មនឹងការបកស្រាយរបស់ស្ថានទូតថា មិនឆ្លុះបញ្ចាំងការពិត
ប្រភព៖ RFA
ពលករខ្មែរធ្វើការនៅម៉ាឡេស៊ី ប្រតិកម្មនឹងការបកស្រាយរបស់ស្ថានទូតដោយមិនឆ្លុះបញ្ចាំងការពិតព្រោះពួកគាត់ត្រូវចំណាយតម្លៃធ្វើដំណើរទៅស្រុកខ្មែរថ្លៃ ខណៈស្ថានទូតមិនទាន់រកដំណោះស្រាយនៅឡើយ។ មន្ត្រីសង្គមស៊ីវិលស្នើសុំឲ្យរដ្ឋាភិបាល និងស្ថានទូតដោះស្រាយបញ្ហានេះ ដើម្បីឆ្លើយតបនឹងទុក្ខកង្វល់របស់ពលករ។
ពលករខ្មែរជាច្រើននាក់ ដែលកំពុងធ្វើការនៅក្នុងប្រទេសម៉ាឡេស៊ីចង់ឃើញស្ថានទូតខ្មែរបញ្ឈប់បុគ្គលដែលទាមទារប្រាក់ពីពួកគាត់ហួសហេតុ ជាថ្នូរនឹងការជួយសម្របសម្រួលបញ្ជូនពួកគាត់ទៅស្រុកខ្មែរវិញ។ ពួកគេចង់ទៅដោយសារពួកគេរងការកេងប្រវ័ញ្ចផលប្រយោជន៍ ស្របពេលជីវភាពពួកគាត់កំពុងលំបាកលំបិនក្នុងស្ថានភាពរីករាលដាលជំងឺកូវីដ១៩។
ពលករមានស្រុកកំណើតនៅខេត្តកំពង់ចាម លោកស្រី វ៉ែន មុន្នី កាលពីថ្ងៃទី២៧ សីហា ឲ្យដឹងថា ពលករខ្មែរជាច្រើននាក់ចង់ត្រឡប់ទៅកម្ពុជាវិញ ពីព្រោះគ្មានការងារធ្វើ ខ្លាចឆ្លងជំងឺកូវីដ១៩ និងប្រឈមប៉ូលិសប្រទេសនេះចាប់ខ្លួនជាដើម។ ស្ត្រីរូបវ័យ៤១ឆ្នាំរូបនេះប្រាប់ថា លោកស្រីគ្មានសមត្ថភាពចំណាយប្រាក់ជាង ១ពាន់៦រយដុល្លារ (១.៦៥០)ទៅឱ្យអ្នករត់ការឯកសារបញ្ជូនលោកស្រីត្រឡប់ទៅកម្ពុជាវិញទេ ព្រោះជីវភាពគ្រួសារលោកស្រីកំពុងត្រដាបត្រដួសហើយប្តីលោកស្រីទើបស្លាប់ដោយសារកូវីដ១៩៖ «ប្រជាពលរដ្ឋយើងនៅម៉ាឡេស៊ីជួបបញ្ហាហិរញ្ញវត្ថុទាំងអស់គ្នាដល់ពេលអ៊ីចឹងចង់ឱ្យខាងស្ថានទូតជួយសម្រួល អ្នកខ្លះគាត់នៅផ្ទះថៅកែរត់ចេញពីផ្ទះថៅកែគាត់អត់មានលិខិតឆ្លងដែនអីត្រឹមត្រូវ អ៊ីចឹងចង់ឱ្យគាត់ជួយឯកសារ ឬមួយជួយសព្វបែបយ៉ាងសម្រាប់ពលរដ្ឋខ្មែរយើងរស់នៅម៉ាឡេស៊ីហ្នឹងចង់ឱ្យខាងខ្មែរជួយគ្នាត្រង់ហ្នឹង ព្រោះអីយើងរស់នៅស្រុកគេពិបាកណាស់»។
ស្រដៀងគ្នានេះដែរ ពលការិនីមានស្រុកកំណើតនៅខេត្តកណ្តាល លោកស្រី រិន សុខា រៀបរាប់ថាលោកស្រីបានមកធ្វើការនៅប្រទេសម៉ាឡេស៊ី ជាង៧ឆ្នាំមកហើយ តែពុំសល់ប្រាក់សម្រាប់ធ្វើដំណើរត្រឡប់ទៅខ្មែរវិញទេ។ លោកស្រីបញ្ជាក់ថា លោកស្រីបង្ខំចិត្តឱ្យកូនខ្ចីបុល ពីស្រុកកំណើតផ្ញើមកម៉ាឡេស៊ីវិញដើម្បីបង់ឱ្យមន្ត្រីស្ថានទូតសម្រួលសម្រួលដំណើរវិលទៅកម្ពុជាវិញ។ លោកស្រីអះអាងទៀតថា លោកស្រីនិងពលករខ្មែរមួយចំនួនទៀតបានបង់ប្រាក់ ៣ពាន់២រយរីងហ្គីត ឬស្មើ៨រយដុល្លារអាមេរិក ឱ្យមន្ត្រីស្ថានទូតម្នាក់ ប៉ុន្តែមន្ត្រីរូបនោះបែរជាយកប្រាក់របស់ពលករហើយក៏គេចវេះពីការទទួលខុសត្រូវ។ លោកស្រីឱ្យដឹងថា រហូតមកដល់ពេលនេះស្ថានទូតមិនចាត់វិធានការ ឬផ្តល់ដំណោះស្រាយណាមួយជូនកម្មករនៅឡើយទេ។ លោកស្រីចាត់ទុកការអះអាងរបស់ស្ថានទូតខ្មែរកន្លងមកមិនឆ្លុះបញ្ចាំងការពិតជាក់ស្តែងជុំវិញទុក្ខលំបាកពលករ ហើយលោកស្រីស្នើឱ្យស្ថានទូតអន្តរាគមន៍ករណីនេះ និងលុបបំបាត់ករណីមន្ត្រី ឬបុគ្គលដែលកេងប្រវ័ញ្ចផលប្រយោជន៍ពលករ៖ «ខ្ញុំគិតថាគាត់គិតពីប្រយោជន៍ផ្ទាល់ខ្លួនមិនបានគិតពីពលករដែលខំធ្វើការនៅក្នុងប្រទេសគេមកឆ្ងាយ យើងមកដល់នេះយើងពឹងស្ថានទូតដោយសារឯកសារធ្វើដំណើរ ឯកសារស្នាក់នៅរបស់យើងផុតសុពលភាព ដល់ពេលអ៊ីចឹងយើងមានតែពឹងគាត់ហើយជាមុខជាមាត់ ជាម៉ែជាឪដែលអាចជួយរត់ការឯកសារយើងត្រឡប់ទៅខ្មែរវិញ ក៏ប៉ុន្តែគាត់បានរំលោភការទុកចិត្តរបស់ពួកយើង»។
ពលករខ្មែរនៅប្រទេសម៉ាឡេស៊ីត្អូញត្អែរថាពួកគាត់ត្រូវចំណាយប្រាក់រហូតខ្ទង់ពាន់ដុល្លារ ឱ្យមន្ត្រីស្ថានទូត ឬអ្នករត់ការដែលតម្លៃនេះថ្លៃហួសលទ្ធភាពរបស់ពលករ ដើម្បីជាថ្នូរសម្របសម្រួលបញ្ជូនពួកគាត់ទៅស្រុកខ្មែរវិញ ខណៈតម្លៃសំបុត្រយន្តហោះពីប្រទេសម៉ាឡេស៊ីទៅកម្ពុជាតម្លៃខ្ទង់ជាង២រយដុល្លារ និងធ្វើតេស្តអវិជ្ជមានកូវីដ១៩ (RT-PCR Test) ប្រហែល ១រយដុល្លារ។ រីឯពលករខុសច្បាប់បូកការបង់ថ្លៃផាកពិន័យប្រមាណជិត១២៥ដុល្លារបន្ថែមទៀតប៉ុណ្ណោះ។ ក្រុមពលករចង់ឱ្យស្ថានទូតដោះស្រាយចំពោះបុគ្គលឆ្លៀតឱកាសប្រព្រឹត្តអំពើពុករលួយ និងកេងចំណេញផលប្រយោជន៍ពីពលករដែលកំពុងលំបាក។
ស្ថានឯកអគ្គរាជទូតប្រចាំប្រទេសម៉ាឡេស៊ី កាលពីថ្ងៃទី២៥ សីហា បានច្រានចោលការលើកឡើងរបស់ពលករ ហើយបញ្ជាក់ថា មន្ត្រីស្ថានទូតមិនបានកេងចំណេញផលប្រយោជន៍នោះទេ ហើយចាត់ទុកករណីនេះជាការយល់ច្រឡំ។ ស្ថានទូតថា ពលករ/ពលការិនី ដែលពុំមានឯកសារស្របច្បាប់ អាចវិលត្រឡប់ទៅកម្ពុជាវិញដោយខ្លួនឯង តាមរយៈកម្មវិធី ធ្វើមាតុភូមិនិវត្តន៍ (Re-calibration Programme) របស់អន្តោប្រវេសន៍ម៉ាឡេស៊ី ដោយបញ្ជាក់ថា ជនបរទេសខុសច្បាប់ទាំងអស់ត្រូវបំពេញឯកសារនិងលក្ខខណ្ឌដូចជាថតចម្លងលិខិតឆ្លងដែន ឬលិខិតធ្វើដំណើរដោយភ្ជាប់សំបុត្រយន្តហោះត្រឡប់ទៅប្រទេសកំណើតរួមជាមួយការបង់ថ្លៃផាកពិន័យឱ្យប៉ូលិសម៉ាឡេស៊ី ហើយត្រូវតេស្ដអវិជ្ជមានកូវីដ១៩ (RT-PCR Test) ដោយតម្លៃទាំងនោះពលករបង់ថ្លៃខ្លួនឯង។ ចំពោះអ្នកដែលមានលិខិតឆ្លងដែនហួសសុពលភាព ខូច ឬបាត់អាចស្នើសុំលិខិតធ្វើដំណើរបណ្ដោះអាសន្ន ឬលិខិតបើកផ្លូវនៅស្ថានឯកអគ្គរាជទូត «ដោយឥតគិតថ្លៃ»។
ទោះបីជាយ៉ាងណាស្ថានទូតថា បុគ្គលិកជាប់កិច្ចសន្យាផ្នែកបកប្រែកិច្ចការពលករឈ្មោះ សូ ផាត បានឈប់បម្រើការងារនៅស្ថានទូតហើយ។ ការជូនដំណឹងនេះបន្ទាប់ពីក្រុមពលករចោទប្រកាន់បុគ្គលិកស្ថានទូតបោកយកប្រាក់ពលករ។
មន្ត្រីកិច្ចការកុងស៊ុលនៃស្ថានខ្មែរប្រចាំប្រទេសម៉ាឡេស៊ី ដោយមិនបញ្ចេញឈ្មោះប្រាប់អាស៊ីសេរីថា ករណីនេះមន្ត្រីស្ថានទូតមិនជាប់ពាក់ព័ន្ធការកេងប្រវ័ញ្ចប្រាក់ពលករនោះទេ ហើយលោកថា ប្រសិនមានបុគ្គលណាទារប្រាក់ពលករខ្ទង់ពាន់ដុល្លារ ស្ថានទូតនឹងចាត់វិធានការចំពោះអ្នកដែលប្រព្រឹត្តខុស៖ «មានន័យថា មិនដឹងគេយកលុយយ៉ាងមិចទេ បើចង់ដឹងច្បាល់ទាល់តែសួរពលករដែលជាប់រឿងហ្នឹងផ្ទាល់ៗ ខាងខ្ញុំនេះខ្ញុំអ្នកបញ្ចេញឯកសារតែមានអ្នកខ្លះគេយកថ្លៃហ្នឹងមែន ប៉ុន្តែលើថ្លៃសំបុត្រយន្តហោះ ធ្វើតេស្តកូវីដ និងបង់ឱ្យប៉ូលិសអាជ្ញាធរខាងម៉ាឡេស៊ី គេផាក៥រយរីងហ្គីត»។
ពលការិនីរងគ្រោះ កញ្ញា ភី សុធី ថ្លែងថា កញ្ញាជាពលករម្នាក់ក្នុងចំណោមពលករច្រើននាក់ដែលរងគ្រោះដោយសារបុគ្គលិកស្ថានទូតយកប្រាក់ប្រមាណ ៨រយដុល្លារក្នុងម្នាក់ជាថ្នូរនឹងការជួយសម្រួលឯកសារត្រឡប់ទៅខ្មែរវិញ។ កញ្ញាចាត់ទុកការការជូនដំណឹងរបស់ស្ថានទូតនេះមិនមែនជាដំណោះស្រាយជួយដល់ពលករនោះទេ ហើយស្នើឱ្យស្ថានទូតចាត់វិធានការដើម្បីបង្វិលប្រាក់ឱ្យពលករវិញ៖ «ដូចជាអត់មានដំណោះស្រាយណាមួយកក់ក្តៅពីស្ថានទូតផ្តល់ដល់ពលករសោះ បើសិនជាទូតគ្រាន់តែបញ្ឈប់ម្នាក់នោះ ហើយគ្មានចំណាត់ការផ្សេងៗបន្តទៀត ចំពោះបុគ្គលនោះឱ្យមានការទទួលខុសត្រូវគឺពួកខ្ញុំពិតជាសោកស្តាយខ្លាំងមែនទែន និងមិនផ្តល់យុត្តិធម៌ណាមួយ»។មន្ត្រីអង្គការសង់ត្រាល់ (Central) ទទួលបន្ទុកផ្នែកពលករ លោក ឌី ថេហូយ៉ា យល់ថា ស្ថានទូតខ្មែរព្យាយាមដោះសារជាងការដោះស្រាយបញ្ហា ដោយមិនទាន់ស្រាវជ្រាវរកការពិតនៃការចំណាយប្រាក់រហូតដល់ខ្ទង់ពាន់ដុល្លារ។ លោកថា ការគំរាមកំហែងពលករមិនឱ្យរាយការណ៍ពីបញ្ហារបស់ខ្លួនគឺជាអំពើរំលោភសិទ្ធិពួកគាត់ធ្ងន់ធ្ងរ ព្រោះសង្គមប្រជាធិបតេយ្យពលរដ្ឋមានសិទ្ធិលើកឡើងនូវតម្រូវការ និងទុក្ខកង្វល់របស់ខ្លួន ដែលរដ្ឋត្រូវស្តាប់និងឆ្លើយតបឱ្យបានត្រឹមត្រូវអំពីបញ្ហាទាំងនោះរបស់ពួកគាត់៖ «យើងបង្កើតឱ្យមានស្ថានទូតស្ថានកុងស៊ុលហ្នឹងធ្វើការទៅលើអី ប្រសិនបើមានជនខិលខូចណាមួយបោកបញ្ឆោតពលរដ្ឋខ្លួនឯង ឬមួយកិបកេងប្រវ័ញ្ច នៅពេលមានបញ្ហាបែបហ្នឹងស្ថានទូតក៏ត្រូវតាមដានស៊ើបដែរ អ្នកណាជាមេខ្យល់ដើម្បីឈានទៅដល់ការចាត់ការមេខ្យល់ហ្នឹងហើយបើជាប់ពាក់ព័ន្ធមន្ត្រីស្ថានទូតអាហ្នឹងក៏ត្រូវទទួលស្គាល់ខ្លួនឯងដែរ កុំព្យាយាមដោះសាជាជាងដោះស្រាយ បើមិនអ៊ីចឹងទេ បញ្ហាវានៅដដែលជាពិសេសបញ្ហានៅម៉ាឡេស៊ីហ្នឹងវាមិនមែនតែឥឡូវទេ»។
សង្គមស៊ីវិលលើកឡើងថា ប្រសិនបើបញ្ហាទាំងនេះរដ្ឋាភិបាលនិងស្ថានទូតមិនដោះស្រាយនឹងធ្វើឱ្យកម្មករខ្មែរប្រឈមការជួញដូរ ការកេងប្រវ័ញ្ចកម្លាំងពលកម្ម ការគំរាមកំហែងផ្លូវច្បាប់ជាដើម។
របាយការណ៍របស់អង្គការសង់ត្រាល់បង្ហាញថា គិតត្រឹមឆ្នាំ២០២០ ពលករខ្មែរស្របច្បាប់ និងពលករខុសច្បាប់ មានចំនួនប្រមាណជាង ១០ម៉ឺននាក់(១០០.០០០) កំពុងធ្វើការនៅក្នុងប្រទេសម៉ាឡេស៊ី៕