អាជ្ញាធរនឹងផាកពិន័យបុគ្គលិកណាហ្គាវើលដ៏ប្រសិនបន្តចេញមកតវ៉ា តែសហជីពថាជាវិធានការស្តង់ដារ២
ប្រភព៖RFI
សាលារាជធានីភ្នំពេញ កាលពីថ្ងៃអង្គារម្សិលមិញបានបញ្ជាក់ថា អាជ្ញាធរលែងធ្វើការអប់រំបន្តទៀតហើយ ដល់អ្នកតវ៉ាដែលជាអតីតបុគ្គលិក និងបុគ្គលិកក្រុមហ៊ុនណាហ្គាវើលដ៏ ហើយអនុវត្តវិធានការច្បាប់ដើម្បីទប់ស្កាត់ការឆ្លងរាលដាលជំងឺកូវីដ-១៩។ ការប្រកាសរបស់អាជ្ញាធរក្រុងភ្នំពេញដូច្នេះ គឺធ្វើឡើងក្រោយក្រុមបុគ្គលិកណាហ្គាវើលដ៏ បានចេញមកតវ៉ា២ថ្ងៃជាប់ៗគ្នាដើម្បីឲ្យក្រុមហ៊ុនដោះស្រាយវិវាទការងារ ក្រោយពីពួកគេខកខានប្រមូលផ្តុំគ្នាអស់ជាច្រើនថ្ងៃ ដើម្បីទប់ស្កាត់ការឆ្លងជំងឺកូវីដ។
សាលារាជធានីភ្នំពេញ បញ្ជាក់ថាសមត្ថកិច្ចរបស់ខ្លួនសម្រេចឈប់ធ្វើការអប់រំទៀតហើយ ហើយនឹងអនុវត្តវិធានការច្បាប់ដោយពិន័យអន្តរការណ៍ជាប្រាក់ចាប់ពី ១លាន ដល់៥លានរៀល ស្របតាមអនុក្រឹត្យស្តីពីវិធានការចត្តាឡីស័កដើម្បីទប់ស្កាត់ការឆ្លងរាលដាលជំងឺកូវីដ-១៩ ក្នុងគោលបំណងឲ្យមានការរាងចាល។
ការសម្រេចដូច្នេះរបស់សាលារាជធានី គឺដោយសារក្រុមអតីតបុគ្គលិក និងបុគ្គលិកក្រុមហ៊ុនណាហ្គាវើលដ៏ បានចេញមកធ្វើការតវ៉ាពីរថ្ងៃជាប់ៗគ្នាបន្ទាប់ពីសម្រាកជាច្រើនថ្ងៃ ដែលអាជ្ញាធរហៅថាជាក្រុមបាតុករមានចរិករឹងរូស បំពានធ្វើសកម្មភាពបាតុកម្មខុសច្បាប់ ក្រោមលេសធ្វើកូដកម្មដើម្បីដោះស្រាយវិវាទការងារ ដោយមិនខ្វល់ពីវិធានការសុខាភិបាល ខណៈដែលជំងឺកូវីដ-១៩ អូមីក្រុងកំពុងមានការឆ្លងខ្ពស់។
លោក ឃុន ថារ៉ូ អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស របស់អង្គការសង់ត្រាល់មើលឃើញថាការអនុវត្តវិធានការច្បាប់ និងការផាកពិន័យដើម្បីទប់ស្កាត់ការឆ្លងរាលដាលជំងឺកូវីដ-១៩ ទៅលើបុគ្គលិកណាហ្គាវើលដ៏ គឺជាការអនុវត្តច្បាប់មិនស្មើភាពគ្នារវាងអ្នកតវ៉ា និងអ្នកដទៃទៀត។
នៅថ្ងៃនេះដែរ សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ ក៏បានចេញសេចក្តីថ្លែងការណ៍ឆ្លើយតបទៅនឹងសេចក្តីសម្រេចរបស់សាលារាជធានី ដោយចាត់ទុកថាវិធានការផាកពិន័យរបស់សាលារាជធានីទៅលើកូដករណាហ្គាវើលដ៏ គឺជាករណីពិសេសមួយដាច់ដោយឡែក។ ក្រុមសហជីពបានលើកយកករណីព្រឹត្តិការណ៍ប្រកួតបាល់ទាត់យុវជនអាស៊ាន U-23 កាលពីពេលថ្មីៗនេះ ថាមានមនុស្សប្រមូលផ្តុំរាប់ម៉ឺននាក់ មកប្រៀបធៀប។
ជាមួយគ្នានេះ សហជីពណាហ្គាវើលដ៏ ក៏នៅតែប្រកាន់ជំហរ៣ចំណុចដដែល គឺស្នើដោះលែងតំណាងរបស់ពួកគេដោយឥតលក្ខខណ្ឌ ក្រុមហ៊ុនណាហ្គាវើលដ៏ត្រូវទទួលយកបុគ្គលិក៣៦៥នាក់ និងអ្នកកំពុងធ្វើកូដកម្មចូលធ្វើការវិញ និងមួយចំណុចទៀតគឺក្រុមហ៊ុនត្រូវចរចាដោយស្មោះត្រង់ជាមួយតំណាងរបស់ពួកគេ។
សូមរំលឹកថាក្រោយខកខានមិនបានធ្វើការតវ៉ាអស់រយៈពេលជិត២សប្តាហ៍ ក្រុមបុគ្គលិក និងអតីតបុគ្គលិកក្រុមហ៊ុនណាហ្គាវើលដ៏ បានប្រមូលផ្តុំគ្នាធ្វើការតវ៉ាឡើងវិញនៅថ្ងៃទី២១ និងថ្ងៃទី២២កុម្ភៈម្សិលមិញ ដោយពួកគេចំនួន១០៣នាក់ ត្រូវបានអាជ្ញាធរឃាត់ខ្លួនដាក់រថយន្តក្រុងយកទៅមណ្ឌលចត្តាឡីស័កព្រែកព្នៅ។ ទោះយ៉ាងណាគេនៅមិនទាន់ដឹងនៅឡើយទេថា ក្រុមបុគ្គលិកណាហ្គាវើលដ៏ ហានចេញមកប្រមូលផ្តុំតវ៉ាទៀតឬយ៉ាងណានៅថ្ងៃនេះ ខណៈដែលអាជ្ញាធរក្រុងព្រមានផាកតាមច្បាប់កូវីដ៕
