ក្រសួងការងារកំពុងពិនិត្យទិន្នន័យចាក់វ៉ាក់សាំង កូវីដ-១៩ របស់កម្មករនិយោជិត
ប្រភព៖ KhmerTimes
កម្មករនិយោជិតមួយចំនួនដែលមិនបានទៅចាក់វ៉ាក់សាំងកូវីដ-១៩ យល់ឃើញថា ការណ៍ដែលក្រសួងការងារតម្រូវឱ្យម្ចាស់រោងចក្រសហគ្រាសពិនិត្យចំនួនកម្មករនិយោជិតឱ្យបានត្រឹមត្រូវ គឺជាសញ្ញាព្រមានដល់ ពួកគេឱ្យទៅចាក់វ៉ាក់សាំង។
ការលើកឡើងនេះបន្ទាប់ពីក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី១៩ ខែកក្កដា បានតម្រូវឱ្យម្ចាស់រោងចក្រសហគ្រាសទាំងអស់ពិនិត្យចំនួនកម្មករនិយោជិត និងបង្កើតក្រុមការងារសុវត្ថិភាពនិងសុខភាពការងារឱ្យបានត្រឹមត្រូវ ព្រមទាំងណែនាំពួកគេឱ្យទៅចាក់វ៉ាក់សាំងដូចជំរុញ ហើយគ្រប់គ្រងទិន្នន័យពាក់ព័ន្ធនឹងវិស័យការងារ។
អ្នកស្រី ចាន់ ហៀត កម្មកររោងចក្រវ័យ៤៧ឆ្នាំ ដែលមិនបានចាក់វ៉ាក់សាំងកូវីដ-១៩នោះទេ ដោយអ្នកស្រីនិយាយថា ខ្លាចចំពោះការចាក់វ៉ាក់សាំងកូវីដ-១៩ និងក្រោមលក្ខខណ្ឌសុខភាពមិនល្អ តែពុំមានលិខិតបញ្ជាក់ពីក្រសួងសុខាភិបាល ឬមណ្ឌលសុខភាព។
អ្នកស្រីបន្តថា៖ «ការប្រកាសរបស់ក្រសួងគេចេះតែបង្ខំយើង [ឱ្យទៅចាក់វ៉ាក់សាំង] អ្នកខ្លះចាក់បានតែម្ដងឬពីរដង អ្នកខ្លះទៀតក៏មិនបានចាក់ដែរ។ ប្រសិនបើគេបញ្ឈប់យើងពីការងារ ក៏បញ្ឈប់ទៅធ្វើម៉េចបានយើងមិនបានចាក់»។
ពៅ ស្រីណែន គឺជាកម្មកររោងចក្រម្នាក់ដែរ។ នាងនិយាយថា នាងត្រូវបានខាងរោងចក្រសួរនាំពីការចាក់វ៉ាក់សាំងកូវីដ-១៩នូវដូសជំរុញពីអ្នកតំណាងរោងចក្រដែរ ប៉ុន្តែនាងបានព្រមទៅចាក់វ៉ាក់សាំងដូសជំរុញទៅតាមការណែនាំរបស់ម្ចាស់រោងចក្រ ក៏ដូចជាតាមការណែនាំរបស់ក្រសួងសុខាភិបាលបានចំនួន៤ដូសរួចហើយ។
នាងនិយាយថា៖ «ខាងរោងចក្រគេតម្រូវឱ្យចាក់ទាំងអស់គ្នា ក៏ប៉ុន្តែអ្នកខ្លះទើបតែបានចាក់ដូសទី២ និងអ្នកខ្លះទៀតទើបតែចាក់បានដូសទី៣។ ខាងរោងចក្រគេបានសួរយើងពីការចាក់វ៉ាក់សាំង ដោយចង់ដឹងថាអ្នកណាខ្លះបានចាក់និងអ្នកណាខ្លះមិនបានចាក់»។
លោក ឃុន ថារ៉ូ ប្រធានគ្រប់គ្រងកម្មវិធីមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស យល់ឃើញថា ការសម្របសម្រួលផ្ដល់ទីតាំង ក៏ដូចជាសម្រួលដល់ការធ្វើដំណើររបស់កម្មករនិយោជិតទៅចាក់វ៉ាក់សាំងកូវីដ-១៩ ប្រហែលជាល្អជាងការព្រមានកម្មករនិយោជិត។
លោកនិយាយថា៖ «ការតម្រូវឱ្យកម្មករនិយោគជិតចាក់វ៉ាក់សាំងនូវដូសជំរុញបន្ថែមទៀត គឺជារឿងមួយដែលល្អ ប៉ុន្តែក្រសួងការងារមានការសម្របសម្រួលផ្ដល់ទីតាំងទៅដល់រោងចក្រ ក៏ដូចជាសម្រួលការធ្វើដំណើរដល់កម្មករនិយោជិតមានភាពងាយស្រួលក្នុងការធ្វើដំណើរទៅចាក់វ៉ាក់សាំង»។
លោកនិយាយថា៖ «ខ្ញុំគិតថា ចំណុចមួយនេះ ប្រហែលជាការល្អជាងព្រមានការកាត់លុយ ព្រោះជាធម្មតាគោលការណ៍ចាក់វ៉ាក់សាំង គឺជា តម្រូវការចាំបាច់ ប៉ុន្តែមិនអាចយកគោលការណ៍ដាក់កំហិត ឬដាក់បន្ទុកលើកម្មករនិយោគជិតនោះទេ។ ដូច្នេះគឺមានតែការសម្របសម្រួលទើបមានភាពងាយក្នុងការទទួលបានការចាក់វ៉ាក់សាំង»។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា និយាយថា ការដែលក្រសួងតម្រូវឱ្យម្ចាស់រោងចក្រសហគ្រាសពិនិត្យចំនួនកម្មករដែលបានចាក់វ៉ាក់សាំង គឺដោយសារតែការកើនឡើងវិញនូវចំនួនអ្នកឆ្លងកូវីដ-១៩មានការកើនឡើងវិញ។ កត្តាមួយទៀត គឺដោយសារតែវ៉ាក់សាំងនៅសល់ច្រើន។ ដូច្នេះក្រសួងបានពញ្ញាក់ស្មារតីកម្មករឱ្យមានការភ្ញាក់រលឹកទៅចាក់វ៉ាក់សាំងកូវីដ-១៩។
លោកនិយាថា៖ «ជាធម្មតា ម្នាក់ៗគេចង់ចាក់វ៉ាក់សាំងណាស់ ប្រសិនបើវ៉ាក់សាំងនោះមានគុណភាព ចំណែកអ្នកដែលមិនចង់ប្រហែលជាមានហេតុផលរបស់ពួកគេ ដែលយើងមិនហ៊ានជំរុញគាត់ទេ។ មន្ត្រីសាធារណៈមានកាតព្វកិច្ចការចាក់វ៉ាក់សាំង ប៉ុន្តែកម្មករទូទៅដូចជាមិនមានការដាក់កាតព្វកិច្ចការចាក់វ៉ាក់សាំងទេ»។ ខ្ញុំទាន់ឃើញមានគោលការណ៍បង្ហាញពីការដាក់កាត់ព្វកិច្ចនេះនៅឡើយទេសម្រាប់កម្មករ»។
លោកបន្តថា៖ «ការមិនទៅចាក់វ៉ាក់សាំង គឺគ្មានហេតុផលណា ដែលត្រូវកាន់ប្រាក់ឈ្មួលរបស់ពួកគាត់ឡើយ។ ប្រសិនបើពួកគាត់យល់ថា ការចាក់វ៉ាក់សាំងណាដែលអាចការពារជំងឺកូវីដ-១៩បានគួរតែទៅចាក់ ប៉ុន្តែការបង្ខំឱ្យទៅចាក់រហូតដល់កាត់ប្រាក់ឈ្មួលរបស់ពួកគាត់ ខ្ញុំដូចជាមិនទាន់ឃើញទេ ហើយក៏ពុំមានគោលការណ៍ដែលអាចធ្វើទៅរួចដែរ»។
យ៉ាងណាលោក ហេង សួរ អ្នកនាំពាក្យក្រសួងការងារ បានប្រាប់ខ្មែរថាមស៍តាមតេឡេក្រាមយ៉ាងខ្លីថា ការតម្រូវឱ្យម្ចាស់រោងចចក្រសហគ្រាសចុះជំនឿន និងផ្ទៀងផ្ទាត់ទិន្នន័យចាក់វ៉ាក់សាំងរបស់កម្មករនិយោជិត គឺដើម្បីធានាថាគ្រប់កម្មករនិយោជិតបានចាក់ដូសជំរុញតាមការកំណត់របស់ក្រសួងសុខាភិបាលហើយឬនៅ។ មួយទៀត គឺដើម្បីធានាសុខភាពរបស់កម្មករនិយោជិត ក៏ដូចជានិរន្តរភាពសង្វាក់ផលិតកម្មរបស់ម្ចាស់រោងចក្រសហគ្រាសផងដែរ៕
