ក្រសួងចំនួន ២ កំពុងដោះស្រាយបញ្ហាភាពមិនស្របច្បាប់របស់ពលករមួយចំនួននៅប្រទេសថៃ
ភ្នំពេញៈ ក្រសួងមហាផ្ទៃកំពុងយកចិត្តទុកដាក់ដោះស្រាយឱ្យមានភាពស្របច្បាប់សម្រាប់ពលករដែលកំពុងធ្វើការនៅប្រទេសថៃ ខណៈដែលក្រសួងការងារ និងអង្គការដៃគូក៏កំពុងពង្រឹងការណែនាំតម្រង់ទិសពលករមុនពេលចេញដំណើរទៅធ្វើការនៅប្រទេសថៃ ផងដែរ។
លោកសក់ សេដ្ឋារដ្ឋលេខាធិការប្រចាំការក្រសួងមហាផ្ទៃបានដឹកនាំកិច្ចប្រជុំពិភាក្សាដោះស្រាយភាពស្របច្បាប់សម្រាប់ពលករទេសន្ដរប្រវេសន៍ក្នុងប្រទេសថៃដែលមានឯកសារផុតសុពលភាពជិតផុតសុពលភាពនិងមិនមានឯកសារ។ នេះបើយោងតាមក្រសួងមហាផ្ទៃនាថ្ងៃទី១៦ខែឧសភា។
លោកសក់ សេដ្ឋាបានលើកឡើងនាថា៖«ស្ថាប័នពាក់ព័ន្ធទាំងអស់ត្រូវរួមគ្នាពិនិត្យប្រព័ន្ធនិងកិច្ចសហប្រតិបត្តិការរវាងកម្ពុជា-ថៃក្នុងការគ្រប់គ្រងពលករដែលធ្វើការងារនៅប្រទេសថៃខណៈប្រទេសទាំង២ បានចុះអនុស្សរណៈយោគយល់គ្នានាពេលកន្លងមកហើយដែរ»។
ចំពោះវិធានការដោះស្រាយចំពោះមុខ លោកសក់ សេដ្ឋា បានស្នើគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ត្រូវបន្ដធ្វើការងារជាមួយភាគីថៃដើម្បីផ្ដល់ភាពស្របច្បាប់ចំពោះពលករខ្មែរណាមិនទាន់មានភាពស្របច្បាប់ដើម្បីធ្វើយ៉ាងណាឱ្យពួកគាត់មានភាពស្របច្បាប់សម្រាប់បំពេញការងារនៅប្រទេសថៃ។
ក្នុងកិច្ចប្រជុំនោះដែរ លោកស្រី ជូប៊ុនអេងរដ្ឋលេខាធិការក្រសួងមហាផ្ទៃនិងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស(គ.ជ.ប.ជ)ក៏បានលើកឡើងដែរថាកម្ពុជាបានបង្កើតឱ្យមានមជ្ឈមណ្ឌលទទួលពលករចំនួន២កន្លែងក្នុងខេត្តបន្ទាយមានជ័យ។ មណ្ឌលនេះក៏ជាទីកន្លែងទទួលព័ត៌មានទិន្នន័យពីពលករដែលបានឆ្លងកាត់ពិសេសពលករដែលត្រូវបានបញ្ជូនត្រឡប់មកពីប្រទេសថៃវិញ។
លោកស្រីបានបញ្ជាក់ថា៖«គ.ជ.ប.ជ ចាត់ទុកការងារទេសន្ដរប្រវេសន៍ជាផ្នែកមួយនៃយុទ្ធសាស្ដ្របង្ការទប់ស្កាត់អំពើជួញដូរមនុស្សជាពិសេសក្នុងចំណោមជនទេសន្ដរប្រវេសន៍ផងដែរ»។
ទន្ទឹមគ្នានេះដែរកាលពីថ្ងៃទី១៦ខែឧសភាក្រសួងការងារនិងបណ្តុះបណ្តាលវិជ្ជាជីវៈសហការជាមួយអង្គការអន្តរជាតិទេសន្តរប្រវេសន៍(IOM)ក៏បានរៀបចំសិក្ខាសាលាស្តីពីការពិនិត្យលទ្ធផលនៃការសិក្សាលើការពង្រឹងការណែនាំតម្រង់ទិសពលករមុនពេលចេញដំណើរទៅធ្វើការនៅប្រទេសថៃផងដែរ។
យោងតាមក្រសួងការងារបានឱ្យដឹងថាសិក្ខាសាលានេះមានគោលបំណងបង្ហាញជូននូវលទ្ធផលនៃការសិក្សាស្តីពីការពង្រឹងការណែនាំតម្រង់ទិសពលករមុនពេលចេញដំណើរទៅធ្វើការនៅប្រទេសថៃនិងពិនិត្យពិភាក្សាផ្តល់ធាតុចូលឬអនុសាសន៍ពីដៃគូពាក់ព័ន្ធលើសេចក្តីព្រាងនៃការសិក្សានេះ។
ជុំវិញរឿងនេះលោកមឿនតុលាប្រធានអង្គការមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស(សង់ត្រាល់)បានប្រាប់កាលពីថ្ងៃទី១៧ខែឧសភាថាមិនថាកាលពីមុនឬបច្ចុប្បន្ននេះទេពលករមួយចំនួននៅតែទៅធ្វើចំណាកស្រុកទៅប្រទេសថៃដោយគ្មានឯកសារស្របច្បាប់ដដែល។
លោកបានបន្តថាតាមការលើកឡើងរបស់ពលករការធ្វើឯកសារមានភាពស្មុគស្មាញនិងត្រូវចំណាយសេវាជាច្រើន។
លោកមឿនតុលាបានថ្លែងថា៖«ប្រសិនក្រសួងបានជជែកជាមួយភាគីថៃពីការផ្ដល់និងពន្លឿនក្នុងការធ្វើឯកសារស្របច្បាប់ដល់ពលករនិងការបន្ថយភាពស្មុគស្មាញមួយចំនួនដែលពលករជួបប្រទះនោះវាជាផលប្រយោជន៍យ៉ាងធំធេងសម្រាប់ពលករយើងដោយសារពួកគាត់ត្រូវការភាពស្របច្បាប់នេះឯងដើម្បីអាចកាត់បន្ថយហានិភ័យនៃការកេងប្រវ័ញ្ចកម្លាំងពលកម្ម»។
យោងតាមការស្ទាបស្ទង់របស់អង្គការសង្គមស៊ីវិលនិងសហជីពនៅប្រទេសថៃបានប៉ាន់ប្រមាណថាពលករខ្មែរ ដែលកំពុងធ្វើការនៅប្រទេសថៃមានប្រមាណជាង២លាននាក់ហើយក្នុងចំណោមពលករទាំងនេះ មានប្រហែលជាង៤០% ជាពលករដែលធ្វើការដោយមិនទាន់មានឯកសារស្របច្បាប់ត្រឹមត្រូវ។នេះបើតាមបញ្ជាក់របស់លោកមឿនតុលា៕
ប្រភព៖ ភ្នំពេញប៉ុស្តិ៍
