ពលករខ្មែរជាច្រើនរយនាក់ជាប់កកស្ទះដំណើរ នៅច្រកទ្វារព្រំដែនប៉ោយប៉ែត
ពលករខ្មែរដែលនាំគ្នាមកលេងបុណ្យចូលឆ្នាំថ្មីស្រុកកំណើតរាប់រយនាក់ជាប់កកស្ទះនៅច្រកព្រំដែនប៉ោយប៉ែតព្រោះការយឹតយ៉ាវនៃបំពេញទិដ្ឋាការចេញចូល (Re-entry Visa) របស់សមត្ថកិច្ចថៃ។ មន្ត្រីសង្គមស៊ីវិលការងារសិទ្ធិពលករ រិះគន់ថា ស្ថានទូតកម្ពុជាប្រចាំប្រទេសថៃ មានការយឹតយ៉ាវក្នុងការផ្ដល់ព័ត៌មានដល់ពលករ និងមិនបានយកចិត្តទុកដាក់ជួយសម្រួលដល់ពលករដែលឆ្លងដែនទាំងនាំងនោះទេ។
ក្រុមពលករខ្មែរដែលកក់ស្ទះនៅច្រកព្រំដែនប៉ោយប៉ែត អ្នកខ្លះជាប់នៅកន្លែងបំពេញឯកសាររយៈពេលមួយថ្ងៃ អ្នកខ្លះទៀតជាប់ពីរថ្ងៃ ហើយពួកគាត់សម្រាកនៅកន្លែងតម្រង់ជួរ និងនៅកន្លែងបំពេញទិដ្ឋាការចេញចូល(Re-entry Visa) នោះតែម្ដង។ អ្នកខ្លះមានបង្វេចឥវ៉ាន់ និងពលករខ្លះទៀតមានកូនៗ មកជាមួយដែរ។ បញ្ហានេះកើតឡើងតាំងពីថ្ងៃទី៨ ខែមេសា តែមកដល់ថ្ងៃទី១១ ខែមេសា មានសភាពធូរស្រាល។
មន្ត្រីផ្នែកការពារសិទ្ធិពលករចំណាកស្រុកនៃអង្គការសង់ត្រាល់ (CENTRAL) ប្រចាំនៅប្រទេសថៃលោក លឹង សុផុន ដែលចុះអង្កេតដល់ព្រំដែន ឱ្យវិទ្យុអាស៊ីសេរីដឹងថា មូលហេតុ ដែលក្រុមពលករសម្រុកចេញតាមច្រកប៉ោយប៉ែត ព្រោះពួកគាត់ទទួលដំណឹងថានៅច្រកប៉ោយប៉ែតនេះ សមត្ថកិច្ចថៃមិនយកប្រាក់ពីពលករទេ ប៉ុន្តែបើចេញតាមច្រកផ្សេងៗ ពលករត្រូវបង់ប្រាក់ប្រមាណ ៥០០បាត ឬស្មើនឹង ១៥ដុល្លារសម្រាប់ពលករម្នាក់បន្ថែមពីលើប្រាក់ថ្លៃបំពេញទិដ្ឋាការចេញចូល (Re-entry Visa)។
អ្នកជំនាញខាងសិទ្ធិពលកររូបនេះ ឱ្យដឹងទៀតថាពលករខ្មែរដែលមកធ្វើការងារនៅប្រទេសថៃ នៅពេលចេញពីប្រទេសនេះត្រូវបំពេញទិដ្ឋាការចេញចូល ដើម្បីរក្សាទិដ្ឋាការ ឬវីសាការងារពួកគេមិនឱ្យខូច។ លោកឱ្យដឹងទៀតថា វិក្កយបត្ររបស់អាជ្ញាធរថៃតម្រូវឱ្យពលករម្នាក់ត្រូវបង់ប្រាក់ថ្លៃធ្វើ ទិដ្ឋាការចេញចូលទៅអាជ្ញាធរថៃចំនួន ១ពាន់បាត ស្មើនឹងប្រមាណ ៣០ដុល្លារ តែអាជ្ញាធរថៃបានទាលុយលើសកំណត់រហូតដល់ប្រាក់ ១.៣០០បាត (មួយពាន់បីរយ) ឬជិត ៤០ដុល្លារ។ មន្ត្រីសង្គមស៊ីវិលរូបនេះសង្កេតឃើញថានៅពេលមានបញ្ហាកកស្ទះសមត្ថកិច្ចខេត្តបន្ទាយមានជ័យ និងមន្ត្រីស្ថានទូតកម្ពុជាប្រចាំប្រទេសថៃ ឃើញចុះទៅអន្តរាគមន៍ដែរ តែហាក់គ្មានប្រសិទ្ធភាពទេ។
លោក លឹង សុផុន៖ «បើតាមខ្ញុំឃើញស្ថានការណ៍ផ្ទាល់ គឺគាត់(ក្រុមពលករ) សម្រាកនៅកន្លែងគាត់តម្រង់ជួរហើយនៅកន្លែង ដែលវាយទិដ្ឋាការចេញចូល (Re-entry Visa) ហើយបងប្អូនមួយចំនួនអង្គុយហើយឈរនៅកន្លែងគាត់តម្រង់ជួរចោល គឺអត់មានបន្ទប់អត់មានផ្ទះសំណាក់អីទេ គឺគាត់រង់ចាំខាងរដ្ឋាភិបាលគេឱ្យវាយចេញ»។
លោក លឹង សុផុន ឱ្យដឹងទៀតថា ក្នុងចំណោមច្រកអន្តរជាតិទាំងអស់មានតែច្រកអន្តរជាតិ ប៉ោយប៉ែតដែលស្ទះជាងគេចំណែកច្រកបានឡែម និងច្រកសំពៅលូន មិនសូវស្ទះនោះទេ គឺស្ទះតែជាងពីរបីម៉ោងពលករអាចធ្វើដំណើរចេញមកខ្មែរបានហើយ។
ស្រដៀងគ្នានេះដែរប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា លោក ឌិន ពុទ្ធី សង្កេតឃើញថាការបញ្ហាកកស្ទះមានកើតឡើងប៉ុន្មានថ្ងៃមកហើយ តែនៅថ្ងៃទី១១ ខែមេសាមិនសូវមានការកកស្ទះទេ។ លោកសង្កេតឃើញថា នៅពេលនេះ សមត្ថកិច្ចកម្ពុជាបានចុះចែកអាហារជូនដល់ពលករ ប៉ុន្តែលោកយល់ថា រូបភាពបែបនេះគ្រាន់តែជាការសម្ដែងឱ្យល្អមើលប៉ុណ្ណោះ។ លោក ឌិន ពុទ្ធី ចង់ឃើញអាជ្ញាធរកម្ពុជាសហការជាមួយជាមួយសមត្ថកិច្ចថៃ ជួយសម្រួលក្នុងការបំពេញឯកសារជួនពលករ ដើម្បីអាចចេញបានលឿន។
លោក ឌិន ពុទ្ធី៖ «ធ្វើការយឹតយ៉ាវដើម្បីអី?ធ្វើអ៊ីចឹងដើម្បីបើកឱកាសឱ្យគេ គប់ជេរ ដូចថា អ្នកដើរនិយាយថា បងឯងប្រញាប់ឱ្យខ្ញុំបីរយ (បីរយបាត) ខ្ញុំជួយជ្រេឱ្យ»។
ទាក់ទងការលើកឡើងនេះ វិទ្យុអាស៊ីសេរីមិនអាចសុំការបំភ្លឺពីអភិបាលខេត្តបន្ទាយមានជ័យលោក អ៊ុំ រាត្រី បានទេនៅថ្ងៃទី១១ខែមេសា។ ចំណែកមន្ត្រីស្ថានទូតទូតកម្ពុជាទទួលបន្ទុកផ្នែកពលករ លោក ឈឹម វិប៊ុល ក៏អាចមិនសុំការបំភ្លឺបានដែរ។
រីឯស្ថានអគ្គកុងស៊ុលកម្ពុជាប្រចាំខេត្តស្រះកែវប្រទេសថៃ ស្នើទៅក្រុមពលករឱ្យបំពេញទិដ្ឋាការចេញចូលនៅកន្លែងពលករធ្វើការឬរស់នៅប្រទេសថៃជាមុនសិន មុនពេលធ្វើដំណើរមកកាន់ច្រកទ្វារព្រំដែនអន្តរជាតិកម្ពុជា–ថៃ។ សេចក្ដីប្រកាសព័ត៌មានចុះកាលពីថ្ងៃទី១០ ខែមេសាឱ្យដឹងទៀតថា ក្នុងករណីដែលពលករមិនបានបំពេញទិដ្ឋាការចេញ–ចូលនៅកន្លែងធ្វើការទេ ពលករអាចទៅធ្វើទិដ្ឋាការចេញ-ចូលនេះ នៅការិយាល័យអន្តោប្រវេសន៍ថៃ (ត.ម៉) ក្នុងស្រុកអារញ្ញ ខេត្តស្រះកែវ (Sa Kaeo Province) ឱ្យហើយ មុនពេលធ្វើដំណើរមកកាន់ច្រកទ្វារព្រំដែនអន្តរជាតិប៉ោយប៉ែត។
ទោះយ៉ាងណាក្ដី មន្ត្រីអង្គការសង់ត្រាល់ (CENTRAL) លោក លឹង សុផុន រិះគន់ថា ការសេចក្ដីជូនដំណឹងនេះគួរផ្ដល់ឱ្យពលករបានដឹងមុនពេលក្រុមពលករចេញដំណើរមកព្រំដែន។ លោក លឹង សុផុន យល់ថា អាជ្ញាធរកម្ពុជាឬតំណាងស្ថានទូតកម្ពុជា គួរយកចិត្តទុកដាក់លើពលករឱ្យបានល្អជាងនេះ ដូចជា ការរៀបចំរថយន្តជួយដឹកពលករពេលទៅដល់ព្រំដែន ជូនទៅកន្លែងបំពេញទិដ្ឋាការចេញចូល ព្រោះពលករភាគច្រើនមិនស្គាល់ទីតាំងនោះទេ ហើយគួរលុបបំបាត់ការយកលុយពីពលករលើសច្បាប់កំណត់ជាដើម។
លោក លឹង សុផុន៖ «បើសិនជាយើងមានវិធានការដោះស្រាយគួរណាតែប្រកាសប្រាប់ឱ្យជាក់លាក់ឬក៏យើងមានអាជ្ញាធរពាក់ព័ន្ធខាងហ្នឹងជួយប្រចាំការ ហើយពន្យល់ណែនាំឱ្យបងប្អូនប្រជាពលរដ្ឋខ្មែរដែលគាត់សម្រុកចេញហ្នឹងគឺគាត់ថា តើធ្វើវិធានការបែបណាដើម្បីឱ្យជឿនលឿនកុំឱ្យគាត់(ពលករ)នៅស្ទះយូរ»។
ពលករខ្មែរធ្វើការងារនៅប្រទេសថៃកំពុងនាំគ្នាធ្វើដំណើរមកលេងស្រុកកំណើត ដើមអបអរបុណ្យចូលឆ្នាំថ្មីជាបន្តបន្ទាប់ចាប់តាំងពីថ្ងៃទី០៨ ខែមេសាមក។ ក្រសួងការងារឱ្យដឹងថាមានពលករ១លាន៣សែននាក់ កំពុងធ្វើការងារនៅប្រទេសថៃ ប៉ុន្តែអង្គការសង់ត្រាល់រកឃើញថា ពលករខ្មែរធ្វើការនៅប្រទេសនេះមានជាង ២លាននាក់។
អ្នកការពារសិទ្ធិពលកររិះគន់ថាសមត្ថកិច្ចព្រំដែនកម្ពុជា និងព្រំដែនថៃមិនបានបង្កភាពងាយស្រួលឱ្យពលករបានឆ្លងដែនទេ តែសមត្ថកិច្ចបានបង្គាប់ឱ្យពលករបង់ថ្លៃសេវាក្រៅផ្លូវការដើម្បីអាចចេញពីព្រំដែនបានលឿន៕
ប្រភព៖ វិទ្យុអាស៊ីសេរី
