កម្មករកាត់ដេរទទូចឲ្យរដ្ឋាភិបាលកំណត់ប្រាក់ឈ្នួលអប្បបរមា ២១៥ដុល្លារ
កម្មករក្នុងវិស័យវាយនភណ្ឌកាត់ដេរថា ការរក្សាប្រាក់ឈ្នួលអប្បបរមាក្នុងកម្រិតទាបមិនអាចឆ្លើយតបតម្រូវការរស់នៅប្រចាំថ្ងៃរបស់ពួកគេបាននោះទេ។ មន្ត្រីសង្គមស៊ីវិលផ្នែកសិទ្ធិការងារទទូចឲ្យរដ្ឋាភិបាល ពិនិត្យលទ្ធភាពតំឡើងប្រាក់ខែគោលដល់កម្មករក្នុងកម្រិតសមរម្យតាមការចង់បានរបស់ពួកគេ។
កម្មករកាត់ដេរលើកឡើងថា ប្រសិនបើរដ្ឋាភិបាល និងនិយោជក ដំឡើងប្រាក់ខែគោល ចំនួន២១៥ដុល្លារទើបអាចឲ្យពួកគេដោះស្រាយបញ្ហាជីវភាពប្រចាំថ្ងៃដូចជា ផ្គត់ផ្គង់អាហារហូបចុក ការសិក្សារបស់កូនៗ ថ្លៃផ្ទះជួល និងការឡើងថ្លៃទំនិញលើទីផ្សារបាន។
កម្មកររោងចក្រលោក កែម សៅរី ប្រាប់អាស៊ីសេរីនៅថ្ងៃទី២៧ កញ្ញា ថា លោកស្នើដល់រដ្ឋាភិបាល និងនិយោជកកំណត់ប្រាក់ឈ្នួលអប្បបរមា ២១៥ដុល្លារ ដើម្បីឲ្យកម្មកររស់នៅបានសមរម្យ។
លោក កែម សៅរី៖ «ខ្ញុំចង់ឲ្យខាងរដ្ឋាភិបាលក៏ដូចជា ក្រសួងដែលពាក់ព័ន្ធក៏ដូចជានិយោជកកំណត់អត្រានៃប្រាក់ខែរបស់កម្មករហ្នឹងឲ្យបាន ២១៥ដុល្លារហ្នឹងមក ដើម្បីឲ្យបងប្អូនកម្មករយើងនឹងដោះស្រាយជីវភាពប្រចាំថ្ងៃហ្នឹងឲ្យមានលក្ខណៈដែលថា សមរម្យ»។
ការលើកឡើងនេះ នៅមុនពេលកិច្ចចរចាកំណត់ប្រាក់ឈ្នួលអប្បបរមា ដែលគ្រោងធ្វើជាលើកចុងក្រោយ នៅថ្ងៃទី២៨ កញ្ញា។
វិទ្យុអាស៊ីសេរីនៅពុំទាន់អាចទាក់ទងរដ្ឋមន្ត្រីក្រសួងការងារលោក ហេង សួរ និងអ្នកនាំពាក្យក្រសួងការងារលោក កត្តា អ៊ន ដើម្បីសុំការឆ្លើយតបសំណើរបស់កម្មករនេះបាននៅឡើយទេ នៅថ្ងៃទី២៧ កញ្ញា។
នៅមុនការបោះឆ្នោតអាណត្តិទី៧ កាលពីថ្ងៃទី៨ មិថុនា អតីតនាយករដ្ឋមន្ត្រីលោក ហ៊ុន សែន បានថ្លែងសារពេលចុះជួបកម្មករជិត២ម៉ឺននាក់ នៅខេត្តកំពង់ឆ្នាំងថា គណបក្សប្រជាជនកម្ពុជា មានគោលនយោបាយច្បាស់លាស់ និងមិនមែនគ្រាន់តែសន្យាទេ។
លោក ហ៊ុន សែន៖ «ចក្ខុវិស័យរបស់រាជរដ្ឋាភិបាល មិនមែនកញ្ឆក់កណ្ដៀតទេ។ គណបក្សប្រជាជនដឹកនាំរាជរដ្ឋាភិបាល មិនមែនគោលនយោបាយកញ្ឆក់កណ្ដៀត ហើយសន្យាឲ្យប្រាក់ខែខ្ពស់ទេ»។
ក្រោយពីការបោះឆ្នោតជ្រើសតាំងតំណាងរាស្ត្រនីតិកាលទី៧ រួចមក លោកនាយករដ្ឋមន្ត្រី ហ៊ុន ម៉ាណែត ក៏បានថ្លែងក្នុងពិធីជួបសំណេះសំណាលជាមួយពលរដ្ឋខ្មែរនៅសហរដ្ឋអាមេរិក កាលពីថ្ងៃទី២៣ កញ្ញាថា រដ្ឋាភិបាលរបស់លោកនឹងដំឡើងប្រាក់ឈ្នួលគោលជូនកម្មករ ប៉ុន្តែលោកមិនបញ្ជាក់ថា ប្រាក់ឈ្នួលកម្មករសម្រាប់ឆ្នាំ២០២៤ នឹងដំឡើងចំនួនប៉ុន្មាននោះទេ។
លោក ហ៊ុន ម៉ាណែត៖ «គុណភាពការងារយើងមិនមែនបង្កើតឲ្យច្រើនទេ យើងត្រូវគិតពីគុណភាពផង។ គុណភាព នៃការងារ ដែលឲ្យបងប្អូនទី១ ការងារ ដែលមានបៀវត្សសមរម្យ ហើយយើងចរចាបៀវត្សបង្កើតរហូតអប្បបរមារបស់យើង»។
ផ្ទុយពីការលើកឡើងនេះ មន្ត្រីគណបក្សប្រឆាំងចាត់ទុកសម្ដីទាំងនេះ ជាវោហារសាស្ត្រប្រជាភិថុតិបោកប្រាស់ប្រជាពលរដ្ឋតែប៉ុណ្ណោះ ដោយសារតែក្រសួងការងារ លម្អៀងទៅខាងថៅកែក្រុមហ៊ុន ដែលមិនបង្ហាញពីឆន្ទៈក្នុងការសម្រួលបញ្ហារស់នៅរបស់ប្រជាពលរដ្ឋនោះទេ។ នៅក្នុងកិច្ចចរចាកំណត់ប្រាក់ឈ្នួលអប្បបរមាកាលពីថ្ងៃទី១៨ កញ្ញាកន្លងទៅ ភាគីសហជីពឯករាជ្យដាក់តួលេខចុងក្រោយ ២១៣ដុល្លារ ភាគីសហជីពរបស់រដ្ឋាភិបាល ដាក់តួលេខចុងក្រោយ២០៤ដុល្លារ ភាគីថៅកែក្រុមហ៊ុន ឬនិយោជក ដាក់តួលេខចុងក្រោយ ២០១,៥ដុល្លារ និងភាគរដ្ឋាភិបាលដាក់តួលេខចុងក្រោយចំនួន២០២ដុល្លារ។
អតីតតំណាងរាស្ត្រគណបក្សសង្គ្រោះជាតិខេត្តកំពង់ធំ លោក ម៉ែន សុថាវរិន្ទ្រ ចាត់ទុកការសន្យាដំឡើងប្រាក់ឈ្នួលដល់កម្មករជា ពាក្យសម្ដីបែបប្រជាភិថុតិតែប៉ុណ្ណោះ ដោយសារការដំឡើងប្រាក់ខែគោល ២ដុល្លារក្នុងមួយខែដែលក្រសួងការងារស្នើឡើង មិនអាចជួយដោះស្រាយបញ្ហាអ្វីដល់ពលរដ្ឋបាននោះទេ។
លោក ម៉ែន សុថាវរិន្ទ្រ៖ «បាទគឺអាក្រក់! អាក្រក់មែនទែនហើយ! គឺគាត់ប្រជាភិថុតិ គឺគាត់ថាគាត់ស្រឡាញ់ប្រជាពលរដ្ឋ ស្រឡាញ់កម្មករ ប៉ុន្តែអានេះមិនមែនទេ ។ បើសិនគាត់ស្រឡាញ់កម្មករពិតប្រាកដ គឺគាត់ធ្វើតាមសំណូមពររបស់សហរដ្ឋអាមេរិក ខាងប្រទេសលោកសេរី ខាងសហភាពអឺរ៉ុបហើយ គឺឲ្យបានសហភាពអឺរ៉ុប គឺឲ្យបានEBA GPSត្រឡប់មកវិញ»។
មន្ត្រីសហជីពថា នៅពេលកិច្ចចរចាកំណត់ប្រាក់ឈ្នួលអប្បបរមាភាគីនិយោជក ឬថៅកែក្រុមហ៊ុន តែងតែមានសហជីពរបស់ខ្លួន ដាក់តួលេខប្រហាក់ប្រហែលគ្នា ដែលរារាំងដល់សហជីពឯករាជ្យ ដែលទាមទារប្រាក់ខែគោលខ្ពស់ដូចកម្មករចង់បាន។ ពួកគេចាត់ទុក សហជីពមិនឯករាជ្យ ធ្វើស្រែលើខ្នងកម្មករ ហើយយកកម្មករជាឈ្នាន់ ដើម្បីទទួលបានលាភសក្ការៈ។
ទាក់ទិននឹងបញ្ហានេះ ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ប្រសិនបើរដ្ឋាភិបាល និងភាគីនិយោជក អាចដំឡើងប្រាក់ខែគោលដល់២១៥ដុល្លារ អាចជួយសម្រួលដល់ការរស់នៅរបស់កម្មករបានមួយកម្រិតស្របពេលការស្រាវជ្រាវរកឃើញថា ពួកគាត់ត្រូវចំណាយចន្លោះពី២៥០ដុល្លារ ដល់៣០០ដុល្លារ។ លោកបន្ថែមថា រដ្ឋាភិបាលគួរតែអនុវត្តវិធានការច្បាប់ចំពោះសហជីព ដែលមិនឯករាជ្យ រារាំងដល់ការស្នើសុំដំឡើងប្រាក់ខែគោលរបស់កម្មករ។
លោក អាត ធន់៖ «ខ្ញុំគិតថា មិនគួរមានទេ ទី១ គឺកម្មករខ្លួនឯងគឺត្រូវតែប្រឆាំងទៅនឹងតំណាងមិនពិតប្រាកដ។ ទី២រដ្ឋគួរតែពិនិត្យមើលច្បាប់សហជីព មិនឯករាជ្យទេ ហើយមិនអាចឯករាជ្យបាន នៅពេលដែលយើងស្នើឲ្យឯករាជ្យហើយនៅតែមិនបាន ច្បាប់គេឲ្យបិទ ឬបញ្ឈប់សហជីពនោះ បាទអ៊ីចឹងគួរតែធ្វើ»។
ទោះជាយ៉ាងនេះក្ដី មន្ត្រីសិទ្ធិការងារ នៃអង្គការសង់ត្រាល់ (Central) លោក ឃុន ថារ៉ូ មានប្រសាសន៍ថា ប្រសិនបើរដ្ឋាភិបាល នៅតែបន្តរក្សាកម្រិតប្រាក់ឈ្នួលកម្មករក្នុងកម្រិតទាបបែបនេះ នឹងបណ្ដាលឲ្យប៉ះពាល់ដល់ការរស់នៅប្រចាំថ្ងៃ ជាពិសេសកម្មករ ដែលកំពុងតែជាប់បំណុលធនាគារ ។ លោកបន្ថែមថា រដ្ឋាភិបាលគួរតែសិក្សា ដើម្បីកាត់បន្ថយអត្រាអតិផរណាទំនិញនៅលើទីផ្សារជាពិសេសអាហារហូបចុក និងប្រេងសាំងជាដើម។
លោក ឃុន ថារ៉ូ៖ «ចុងក្រោយនោះខ្ញុំគិតថា រដ្ឋត្រូវតែចាត់វិធានការចាំបាច់ជាក់លាក់ ហើយនឹងមានប្រសិទ្ធភាពទាក់ទងទៅនឹងការពិនិត្យមើលអំពីកញ្ចប់ថវិកាជាតិ ឬក៏ទុនបម្រុងណាមួយសម្រាប់ឆ្លើយតបទៅនឹងស្ថានភាព នៃវិបត្តិបំណុលវ័ណ្ឌករបស់កម្មករនិយោជិក ដើម្បីសម្រាលបន្ទុករបស់ពួកគាត់ជាពិសេស គឺការបង់ដើម និងការប្រាក់អីជាដើមហ្នឹង»។
នៅថ្ងៃទី២១ ខែកញ្ញា អង្គការសង់ត្រាល់ (CENTRAL) រួមជាមួយសហជីព និងអង្គការអន្តរជាតិចំនួន ៤ទៀត រួមមាន សហព័ន្ធសហជីពកម្ពុជា (CATU) សម្ព័ន្ធសហជីពប្រជាធិបតេយ្យ កម្មករនៅកម្ពុជា អង្គការអាក់សិន អេដ (ACTION AID) និងអង្គការ ឃ្លីន ខ្លូស ខាំផេន (Clean Clothes Campaign) បានចេញរបាយការណ៍មួយ រកឃើញថា កម្មករ ៥៤ភាគរយ មិនមានលទ្ធភាពសងប្រាក់ឱ្យម្ចាស់បំណុលបានទៀងទាត់នោះឡើយ ខណៈរោងចក្រមួយចំនួននៅតែបិទទ្វារដំណើរការអាជីវកម្ម ដោយមិនបានទូទាត់ប្រាក់បំណាច់ផ្សេងៗ ទៅឱ្យកម្មករនោះឡើយ។ សហជីពលើកឡើងថា ប្រសិនបើរដ្ឋាភិបាលមិនដំឡើងប្រាក់ឈ្នួលគោលសមរម្យដល់កម្មករនោះទេ កម្មករនឹងបន្តរស់នៅក្នុងជីវភាពខ្វះខាត និងមិនអាចរំដោះខ្លួនចេញពីវិបត្តិបំណុលវ័ណ្ឌកនោះឡើយ៕
ប្រភព៖ វិទ្យុអាស៊ីសេរី
